އެކްސިޑެންޓެއްގައި އުޅަނދު ދުއްވާ މީހާއާއި އެ އުޅަނދަށް ލިބޭ ގެއްލުމުގެ ބަދަލު ހޯދުމަށް މަގުފަހިކުރުމުގެ ގޮތުން، ކޮމްޕްރިހެންސިވް މޮޓޯ އިންޝުއަރެންސެއް ތައާރަފު ކުރުމަށް އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅައިފި އެވެ.
މި ބިލު މަޖިލީހަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ.މި ބިލުގެ ފުރަތަމަ ކިޔުން އިއްވުން މިއަދުގެ ޖަލްސާއަށް ވަނީ އެޖެންޑާ ކޮށްފަ އެވެ.
މި އިސްލާހު ހުށަހެޅި ސަބަބެއް ކަމަށް ބިލުގައި ބަޔާންކޮށްފައިވަނީ، ރާއްޖޭގައި މިހާރު އަމަލުކުރަމުންދާ 3 ވަނަ ފަރާތުގެ އިންޝުއަރެންސް ނިޒާމުގެ ސަބަބުން، އުޅަނދަށް ނުވަތަ އުޅަނދު ދުއްވާ މީހާއަށް ލިބޭ ގެއްލުންތަކަށް ބަދަލު ލިބުމުގައި ހުރަސްތަކެއް ހުރުމެވެ. މި ބިލުގެ މައިގަނޑު މަގުސަދަކީ އެކްސިޑެންޓެއްގެ ސަބަބުން އުޅަނދަށާއި ދުއްވާ މީހާއަށް ލިބޭ ގެއްލުމަށް ބަދަލު ލިބޭނެ ހަރުދަނާ އުސޫލެއް ގާއިމުކުރުމެވެ.
މި ބިލުގައިވާ ގޮތުން، އެއްގަމު އުޅަނދު ދުއްވަން ވާނީ އެކްސިޑެންޓެއް ވެގެން ގެއްލުން ލިބޭ މީހަކަށް ނުވަތަ ތަނަކަށް ލިބޭ ގެއްލުމުގެ އިތުރުން، އެކްސިޑެންޓުވީ އުޅަނދަށާއި އުޅަނދު ދުއްވި މީހާއަށް ލިބޭ ގެއްލުމުގެ ބަދަލު ލިބިދޭނެ ފަދަ ކޮމްޕްރެހެންސިވް މޮޓޯ އިންޝުއަރެންސެއް ކުރުމަށް ފަހުގަ އެވެ. އަދި މިކަމާ ގުޅޭ ގަވާއިދު، ގާނޫނަށް އަމަލުކުރަން ފަށާތާ ތިން މަސް ދުވަހުގެ ތެރޭގައި މަރުކަޒީ ބޭންކް (އެމްއެމްއޭ) އިން އާންމުކުރަން ޖެހޭނެ ކަމަށްވެސް ބިލުގައިވެ އެވެ.
މި ބިލުގައި ކޮމްޕްރެހެންސިވް މޮޓޯ އިންޝުއަރެންސްގެ ގޮތުގައި ބަލާނެ ކަންތައްތަކުގެ ތެރޭގައި ހިމެނެނީ:
- އެކްސިޑެންޓެއްގެ ސަބަބުން 3 ވަނަ ފަރާތެއް މަރުވުން، ޖިސްމާނީ ހާނިއްކައެއް ވުން ނުވަތަ މުދަލަށް ލިބޭ ގެއްލުމަށް ޒިންމާވުން.
- އަމިއްލަ އުޅަނދަށް ލިބޭ ސީދާ ގެއްލުމާއި އުޅަނދު ފުރޮޅައިލުމުގެ ސަބަބުން ލިބޭ ގެއްލުންތައް.
- އަލިފާނުގެ ހާދިސާތަކާއި، ވައްކަން ކުރުމާއި، ގަސްތުގައި ދޭ ގެއްލުންތައް.
- ފެންބޮޑުވުމާއި ތޫފާން ފަދަ ގުދުރަތީ ކާރިސާތަކުގެ ސަބަބުން ލިބޭ ގެއްލުންތައް.
މިފަދަ އިސްލާހެއް ހުށަހަޅާފައި މިވަނީ ރާއްޖޭގައި، ހާއްސަކޮށް މާލެއާއި އައްޑޫ ފަދަ އާބާދީ ބޮޑު ސިޓީތަކުގައި ނުރައްކާތެރި އެކްސިޑެންޓުތައް ހިނގާ މިންވަރު އިތުރުވެފައިވާ ދަނޑިވަޅެއްގައެވެ. ފުލުހުންގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް 400 އަށް ވުރެ ގިނަ ޓްރެފިކް އެކްސިޑެންޓު ވަނީ ރިޕޯޓުކޮށްފައެވެ.
