ޔާމީން ރަޝީދު އަނިޔާވެރި ގޮތަކަށް މަރާލި މައްސަލައިގެ ޝަރީއަތް ކްރިމިނަލް ކޯޓުގައި މިއަދު އަލުން ފެށުމަށް ތާވަލުކޮށްފި އެވެ.
އެގޮތުން އެ މައްސަލައިގެ ޝަރީއަތް މިއަދު 4:30 ގައި ފަށާ ޝަރީއަތް ލައިވް ކުރާނެ އެވެ. އަދި މި މައްސަލަ ބަލެމުމަށް ކުރިމިނަލް ކޯޓުގެ ތިން ގާޒީންގެ ބެންޗެއް ވެސް ވަނީ އެކުލަވާލައިފަ އެވެ. ދައުވާ ލިބޭ ހަތަރު މީހުން ވެސް މި ވަގުތު ތިބީ ކްރިމިނަލް ކޯޓުގެ އަމުރެއްގެ ދަށުން ޝަރީއަތް ނިމެންދެން ބަންދުގަ އެވެ.
މީގެ ކުރިން ވަނީ ކްރިމިނަލް ކޯޓުގައި ޔާމީން މަރުގެ މައްސަލައިގައި ހިންގި ޝަރީއަތަށް ފަހު، ދައުވާ ލިބުނު ހ. އަންނާރުމާގޭ އިސްމާއިލް ހައިޝަމް ރަޝީދު އަދި ހުޅުމާލޭ ނަމްބަރު 11399 އަހުމަދު ޒިހާން އިސްމާއިލް އުމުރަށް ޖަލަށްލާން ހުކުމްކޮށްފަ އެވެ.
އޭގެ އިތުރުން ގދ. ގައްދޫ ސިންދުބާދުގޭ މުހައްމަދު ދިފްރާނު އާއި މ. ކުދެހިގޭ ހަސަން ޝިފާޒްގެ އިތުރުން މ. ތާއިފް އިސްމާއިލް ރަޝީދު އަދި މ. ކޮޅުފުށީ އީސްޓް، ހުސައިން ޒިޔާދުގެ މައްޗަށް ކުށް ސާބިތުނުވާ ކަމަށް ކުރިމިނަލް ކޯޓުން ކުރިން ކަނޑައެޅި އެވެ.
ކްރިމިނަލް ކޯޓުގެ އެ ހުކުމް ހައި ކޯޓުގައި އިސްތިއުނާފުކުރުމާއެކު، މިދިޔަ ޑިސެމްބަރު މަހުގެ ތެރޭގައި ހައި ކޯޓުން ހުކުމް ކޮށްފައިވަނީ އުމުރަށް ޖަލަށްލި ދެ މީހުންގެ ޖަލު ހުކުމް ބާތިލްކުރުމަށެވެ. އަދި އެ ދެ މީހުންނާއި އެ މައްސަލާގައި ކުށް ސާބިތު ނުވެ ސަލާމަތްވި ދެ މީހުންގެ މައްސަލަ އަލުން ބެލުމަށް ވަނީ ކްރިމިނަލް ކޯޓުގެ މައްޗަށް އަމުރުކޮށްފަ އެވެ.
ކުށް ސާބިތުނުވާ މީހުންގެ ތެރެއިން އަލުން ބަލަން އެންގީ އިސްމާއިލް ރަޝީދާއި ދިފްރާންގެ މައްސަލަ އެވެ. އެ ދެ މީހުންގެ މައްސަލަ ހައި ކޯޓަށް ހުށަހެޅީ ދައުލަތުގެ ފަރާތުންނެެވެ.
