ރާއްޖޭގެ އެންމެ ބޮޑު ޓޫރިޒަމް ޓްރޭޑް ޝޯ ކަމަށްވާ ޓީޓީއެމް މޯލްޑިވްސްގެ 2024 ވަނަ އަހަރުގެ އެޑިޝަން 1000 އަށްވުރެ ގިނަ ބައިވެރިންނާއެކު ފަށައިފި އެވެ. މާދަމާގެ ނިޔަލަށް ކުރިއަށްދާ މި ހަރަކާތުގައި 3،000 ޕްރީ ޝެޑިއުލް ބައްދަލުވުން ކުރިއަށް ގެންދާނެ އެވެ.

މިއަހަރު 100 އަށް ވުރެ ގިނަ ރިސޯޓާއި 250 އަށް ވުރެ ގިނަ އޭޖެންޓުންނާއި ޓުއާ އޮޕަރޭޓަރުން ބައިވެރިވެފައިވާއިރު، ރާއްޖޭގެ ޓޫރިޒަމް ދާއިރާގެ ގާތްގަނޑަކަށް 500 ބައިވެރިން ވެސް ބައިވެރިވެ އެވެ.

ޓީޓީއެމް މޯލްޑިވްސް އިން އިންޑަސްޓްރީގެ ފަންނީ ބޭފުޅުންނަށް ވިޔަފާރީގެ ގުޅުން ބަދަހިކުރުމަށާއި ފަތުރުވެރިކަމުގެ ދާއިރާއިން އާ ފުރުސަތުތައް ހޯދުމުގެ ޕްލެޓްފޯމެއް ހުޅުވާލައިފި އެވެ. ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ ރާއްޖޭގެ ފަތުރުވެރިކަން ކުރިއެރުވުމަށް ޓީޓީއެމް ފަދަ ޓްރޭޑް ޝޯތަކުގެ މުހިންމުކަން ފާހަގަ ކުރެއްވި ރާއްޖޭގެ ޓޫރިޒަމް މިނިސްޓަރު އިބްރާހިމް ފައިސަލް އެވެ.

މިނިސްޓަރު ފައިސަލް ދެއްކެވި ވާހަކަފުޅުގައި ރާއްޖޭގެ ފަތުރުވެރިކަމުގެ ދާއިރާ ދެމެހެއްޓެނިވި ތަރައްޤީއާއި ކުރިއެރުން ދެމިއޮތުމަށްޓަކައި ސިނާޢަތުގެ ހުރިހާ ފަރާތްތަކުގެ މެދުގައި އެއްބާރުލުން ދިނުމަށް އަލިއަޅުއްވާލެއްވިއެވެ.

ޓީޓީއެމް އެވޯޑްސް ހަފްލާ އާއި ގާލާ ނައިޓް އޮންނާނީ އަދާރަން ސެލެކްޓް ހުދުރަންފުށީގައެވެ. މިއަހަރަކީ ރާއްޖޭގެ ޓޫރިޒަމް އޮޕަރޭޓަރުން ދުނިޔޭގެ ބޮޑެތި ޓްރެވަލް އޭޖެންޓުންނާ ގުޅުވައިދޭ ޓީޓީއެމް ރާއްޖޭގެ 8 ވަނަ އެޑިޝަނެވެ.