ކުރިއަށްއޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބުގައި، ވޯޓަކާ ނުލާ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް 69 ގޮނޑި ކަށަވަރުވެއްޖެ އެވެ.
އިލެކްޝަންސް ކޮމިޝަނުން މިކަން ހާމަކުރީ ކެންޑިޑޭޓުންގެ ނަންތައް ތަރުތީބުކޮށް، ނަން އަނބުރާ ގެންދިއުމުގެ މުއްދަތު ހަމަވުމާ ގުޅިގެންނެވެ.
އިލެކްޝަންސް ކޮމިޝަނުން ހާމަކޮށްފައިވާ މައުލޫމާތުތަކަށް ބަލާއިރު، އިންތިހާބަކާ ނުލައި އެންމެ ގިނަ ގޮނޑި ކަށަވަރުކޮށްފައިވަނީ ޕީއެންސީންނެވެ. އެ ޕާޓީއަށް ލޯކަލް ކައުންސިލް އިންތިހާބުން 28 ގޮނޑި ކަށަވަރުވެފައިވާއިރު، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުން 41 ގޮނޑި ވަނީ ކަށަވަރުވެފަ އެވެ.
ކައުންސިލް އިންތިހާބަށް ބަލާއިރު، ޕީއެންސީގެ އިތުރުން އެމްޑީޕީއަށް އެއް ގޮނޑި، އަދާލަތު ޕާޓީއަށް އެއް ގޮނޑި އަދި އަމިއްލަ ގޮތުން ވާދަކުރި ތިން ކެންޑިޑޭޓަކަށް ވަނީ ގޮނޑި ކަށަވަރުވެފަ އެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުން އެމްޑީޕީއަށް ފަސް ގޮނޑި، އަދާލަތު ޕާޓީއަށް އެއް ގޮނޑި އަދި އަމިއްލަ ގޮތުން ވާދަކުރި ދެ ކެންޑިޑޭޓަކަށް ގޮނޑި ކަށަވަރުވެފައިވެ އެވެ.
އިލެކްޝަންސް ކޮމިޝަނުން ބުނި ގޮތުގައި، އިންތިހާބަކާ ނުލާ މި ގޮނޑިތައް ކަށަވަރުވީ އިންތިހާބު ކުރަންޖެހޭ އަދަދަށްވުރެ ގިނަ ކެންޑިޑޭޓުން ކުރިމަތިނުލުމާއި، ބައެއް ކެންޑިޑޭޓުން ނަން އަނބުރާ ގެންދިއުމާ ގުޅިގެންނެވެ. ނަން އަނބުރާ ގެންދިއުމުގެ ފުރުސަތު ހަމަވިއިރު، ޖުމްލަ 67 ކެންޑިޑޭޓުން ވަނީ ނަން އަނބުރާ ގެންގޮސްފަ އެވެ. މީގެ ތެރޭގައި ކައުންސިލް އިންތިހާބަށް ކުރިމަތިލީ 36 ކެންޑިޑޭޓަކާއި އަންހެނުންގެ ކޮމިޓީތަކަށް ކުރިމަތިލީ 31 ކެންޑިޑޭޓަކު ހިމެނެ އެވެ.
އަންނަ އޭޕްރީލް މަހު ހަތަރެއްވާ ހޮނިހިރު ދުވަހު ބޭއްވުމަށް ހަމަޖެހިފައިވާ މި އިންތިހާބުތަކުގައި ވާދަކުރުމަށް ފުރަތަމަ 2,994 ކެންޑިޑޭޓުން ހުށަހެޅި ނަމަވެސް، ނަން އަނބުރާ ގެންދިޔަ ކެންޑިޑޭޓުންނާއެކު މިހާރު ވާދަކުރާ ކެންޑިޑޭޓުންގެ ޖުމްލަ އަދަދަކީ 2,927 އެވެ.
