2025ވަނަ އަހަރުގެ ކުޅިވަރު އެވޯޑު ހަފްލާ މިއަހަރުގެ ފަހުކޮޅުގައި އޮންނާނެ ކަމަށް މިނިސްޓްރީ އޮފް ސްޕޯޓްސް, ފިޓްނަސް އެންޑް ރިކްރިއޭޝަން އިން ބުނެފިއެވެ.

މިނިސްޓްރީން މިކަން ހާމަކޮށްފައިވަނީ އިއްޔެ އާންމުކުރި ކުޅިވަރު ނޮމިނޭޝަންސްތަކަށް ގިނަ ބައެއްގެ ފާޑުކިއުންތައް އަމާޒުވެފައިވަނިކޮށެވެ.

މިނިސްޓްރީން އެކްސްގައި ކުރި ޕޯސްޓެއްގައި ވިދާޅުވީ މާދަމާރޭ ބާއްވަން ހަމަޖެހިފައިވާ "މޯލްޑިވްސް ސްޕޯޓްސް އެވޯޑްސް 2025" އަކީ 2024 ވަނަ އަހަރު ގައުމީ ޓިމްތަކާއި، ކުޅުންތެރިން އަދި އޮފިޝަލުން ހޯދާފައިވާ ކާމިޔާބީތައް ފާހަގަކުރުމަށް ބާއްވާ އެވޯޑު ހަފުލާ ކަމަށެވެ.

"މި ހަފްލާ 2025ގައި ކުރިން ބާއްވަން ހަމަޖެހިފައި އޮތް ނަމަވެސް އެކި ސަބަބުތަކާއިހުރެ މިއަހަރަށް އޮތީ ފަސްކުރެވިފައި," މިނިސްޓްރީގެ ޕޯސްޓުގައި ވެއެވެ.

މީގެ އިތުރުން އެ ޕޯސްޓުގައި ބުނީ "މޯލްޑިވްސް ސްޕޯޓްސް އެވޯޑްސް 2025" މާދަމާރޭ ބޭއްވިނަމަވެސް 2025ގެ ކާމިޔާބީތައް ފާހަގަކުރާ އެވޯޑު ހަފުލާ، "މޯލްޑިވްސް ސްޕޯޓްސް އެވޯޑްސް 2026" މިއަހަރުގެ ފަހުކޮޅު އޮންނާނެކަމަށެވެ.

2024 ވަނަ އަހަރުގެ އެވޯޑު ހަފްލާ އޮންނާނީ 15 ފެބުރުއަރީވާ އާދިއްތަދުވަހުގެ ރޭ ގަލޮޅު ދަނޑުގައެވެ.