ޗައިނާގެ އެންމެ ބާރުގަދަ އަސްކަރީ ފޯސް ކަމަށްވާ ސެންޓްރަލް މިލިޓަރީ ކޮމިޝަން (ސީއެމްސީ)ގެ އެންމެ މަތީ ފަންތީގެ ޖެނެރަލުން ހިމެނޭ ގޮތަށް އަސްކަރިއްޔާގެ އިސް ލީޑަރުންތަކެއް މަގާމުން ވަކިކޮށް ތަހުގީގުގެ ދަށަށް ގެނެސްފި އެވެ.

އެންމެ ފާހަގަ ކުރެވޭ ކަމަކީ ކޮމިޝަންގެ ނައިބު ރައީސް އަދި ޝީގެ އެންމެ ގާތް އެކުވެރިންގެ ތެރޭގައި ހިމެނޭ ޒާންގް ޔޫކްސިއާ ވެސް ވަނީ ހައްޔަރުކޮށްފައެވެ.

ބެއިޖިންގެ އޮފިޝަލުން ބުނާ ގޮތުގައި މިއީ އަސްކަރިއްޔާގައި ކޮރަޕްޝަނާއި ދެކޮޅަށް ކުރަމުންދާ މަސައްކަތެކެވެ.

ހައްޔަރު ކޮށްފައިވާ މީހުންގެ ތެރޭގައި ޗައިނާގެ ޕީޕަލްސް ލިބަރޭޝަން އާމީ (ޕީއެލްއޭ) ގެ މަތީ ކޮމާންޑަރުންގެ ދިހަވަރަކަށް މީހުން ވެސް ހިމެނެއެވެ. މީގެ އިތުރުން ސީއެމްސީ ގެ ޕްލޭނިންގ އާއި އޮޕަރޭޝަންތައް ބަލަހައްޓާ ޖޮއިންޓް ސްޓާފް ޑިޕާޓްމަންޓާއި ސިޔާސީ މަސައްކަތު ޑިޕާޓްމަންޓުގެ އޮފިސަރުން ހިމެނެއެވެ.

ބައެއް މަސްދަރުތަކުން މީގެ ކުރިން ބުނި ގޮތުގައި ރައީސް ޝީ ޖިންޕިން އާއި ދެކޮޅަށް އަސްކަރީ ބަޣަވާތެއް ގެންނަން އަސްކަރިއްޔާގެ އިސް ބައެއް ބޭފުޅުން މަސައްކަތް ކޮށްފައި ވެއެވެ.