އޭޝިއާ މީޑިއާ ސަމިޓް ރާއްޖޭގައި ބާއްވަން ނިންމައިފި އެވެ.
މިފަހަރު ބާއްވާ ސަމިޓަކީ 21 ވަނަ އޭޝިއާ މިޑިއާ ސަމިޓެވެ. އެ ސަމިޓް ހޯސްޓް ކުރާ ގައުމެއްގެ ގޮތުގައި ރާއްޖެ ހަމަޖެއްސުމަށް ޕަބްލިކް ސާވިސް މީޑިއާ އާއި އޭޝިއާ ޕެސިފިކް އިންސްޓިޓިއުޓް ފޯ ބްރޯޑްކާސްޓިން ޑިވެލޮޕްމެންޓްއާ ދެމެދު މެމޮރެންޑަމް އޮފް އަންޑަސްޓޭންޑިން ނުވަތަ އެމްއޯޔޫއެއްގައި ސޮއިކޮށްފި ކަމަށް ޕީއެސްއެމުން ވަނީ ބުނެފައި އެވެ.
ޕަބްލިކް ސާވިސް މީޑިއާގެ މައި މަރުކަޒުގައި މިއަދު ސޮއިކުރެވުނު މި އެއްބަސްވުމުގެ ދަށުން މި ސަމިޓް އިންތިޒާމުކޮށް ރޭއްވުމުގައި މަސްއޫލިއްޔަތުތައް ހަވާލު ކުރެވިފައި ވަނީ ޕީއެސްއެމްއާ ކަމަށް އެ މީޑިއާއިން ވަނީ މައުލޫމާތު ދީފައިވެ އެވެ. އެމްއޯޔޫގައި ޕީއެސްއެމްގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހްމަދު ޝަކީބު އެވެ. އަދި އޭއައިބީޑީގެ ފަރާތުން ސޮއި ކުރެއްވީ އޭއައިބީޑީގެ އޭޝިއާ ޕެސިފިކުގެ ސެކެޓަރީ ޖެނެރަލް ފިލޮމީނާ ނަނަޕްރެގަޒަމް އެވެ.
https://x.com/psmnewsmv/status/2021499689649029378?s=20
21 ވަނަ އޭޝިއާ މީޑިއާ ސަމިޓް ރާއްޖޭގައި ބޭއްވުމަށް ހަމަޖެހިފައިވަނީ މި އަހަރުގެ މެއި މަހުގަ އެވެ. ރާއްޖެއަކީ މިފަހަރުގެ މީޑިއާ ސަމިޓް ހޮސްޓްކުރާ ގައުމަކީ ރާއްޖެކަން އިއުލާނު ކުރީ ކެމްބޯޑިއާގައި ބޭއްވި 20 ވަނަ އޭޝިއާ މީޑިއާ ސަމިޓުގަ އެވެ. މިއީ ދިވެހި ރާއްޖޭގައި މީޑިއާ ސަމިޓެއް ބާއްވާ ފުރަތަމަ ފަހަރެވެ.
މީޑިއާ ސަމިޓްގެ މައިގަނޑު މަގުސަދަކީ އޭޝިއާ ޕެސިފިކް ސަރަހައްދުގެ މީޑިއާ ލީޑަރުންނާއި، ޕޮލިސީ ހަދާ ފަރާތްތަކާއި، ބްރޯޑްކާސްޓަރުންނާއި، ރެގިއުލޭޓަރުން އަދި އިންޑަސްޓްރީގެ ތަޖުރިބާކާރުން އެތަނެއްގައި ބައްދަލުކުރުމެވެ. އަދި އެ ސަމިޓަކީ ބްރޯޑްކާސްޓިން އަދި ޑިޖިޓަލް މީޑިއާއާ ގުޅޭ ގޮތުން މަޝްވަރާ ކުރުމުގެ ޕްލެޓްފޯމެކެވެ.
ޔުނެސްކޯގެ ދަށުން އުފައްދާފައިވާ އޭއައިބީޑީ އަކީ އޭޝިއާ ޕެސިފިކް ސަރަހައްދުގައި ޕަބްލިކް ސާވިސް އަދި އިލެކްޓްރޯނިކް މީޑިއާ ހަރުދަނާ ކުރުމަށް މަސައްކަތް ކުރާ އިންސްޓިޓިއުޓެކެވެ.
