ސަރުކާރުން "ބޯހިޔާވަހިކަން އެންމެނަށް" ސްކީމަށް އަލަށް އިތުރުކުރި ދެ ކެޓަގަރީގެ އުސޫލު ކުރިއަށް އޮތް ހަފްތާގެ ތެރޭގައި އިއުލާނުކުރުމަށް މަސައްކަތް ކުރަމުންދާކަމަށާއި، މާޗު މަހުގެ ތެރޭގައި ފޯމު ހުށައެޅުމަށް ހުޅުވާލާނެކަމަށް ހައުސިން މިނިސްޓަރު ޑރ. އަބްލުﷲ މުއްތަލިބު ވިދާޅުވެއްޖެ އެވެ.
"ބޯހިޔާވަހިކަން އެންމެނަށް" ސްކީމަށް އަލަށް އިތުރުކުރި ދެ ކެޓަގަރީގެ ގޯތިތަކާ ބެހޭގޮތުން މައުލޫމާތު ހިއްސާ ކުރައްވަމުން މިނިސްޓަރު ވިދާޅުވީ އެކަމާގުޅޭ އުސޫލު މިހާރު ގާތްގަނޑަކަށް އެއްކޮށް ފައިނަލް ކުރެވިފައިވާ ކަމަށެވެ. އަދި ރޯދައިގެ ކުރިން އުސޫލު އާންމު ކުރުމަށް މަސައްކަތް ކުރަމުންދާ ކަމަށެވެ.
ބިންވެރިޔާ ސްކީމްގެ ދަށުން މިފަހަރު ދޫކުރާ ގޯތިތަކަށް އަނބިމީހާ ނުވަތަ ފިރިމީހާއަށް ރާއްޖޭގެ މާލެ ސަރަހައްދުގައި ބޯހިޔާވަހިކަމެއް ލިބިފައިވާނަމަ، އެ ސްކީމަކަށް ކުރިމަތިނުލެވެ އެވެ. ނަމަވެސް އަލަށް އިތުރުކުރި 2 ކެޓަގަރީގެ ދަށުން އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަމެއް އޮތް ނަމަވެސް ކުރިމަތިލެވޭ ގޮތަށް ހަމަޖެހޭނެ ކަމަށް ރައީސް ޑރ. މުއއިްޒުގެ ރިޔާސީ ބަޔާނުގައިވެސް ވަނީ ވިދާޅުވި އެވެ.
ސަރުކާރުން ކުރިއަށް ގެންދާ އާ ޕްރޮގްރާމުގައި ހިމެނޭނީ މިދިޔަ ސަރުކާރުން ކުރިއަށް ގެންދިޔަ ބިންވެރިޔާ ސްކީމަށް ޖޮއިންޓް އެޕްލިކޭޝަން ހުށަހަޅައިގެން ގޯތި ލިބުނު ފަރާތްތަކުގެ ތެރެއިން، ގޯތި ދޫކޮށްލަން އެއްބަސްވާނަމަ، އެފަރާތްތަކަށް ވަކިވަކިން ގޯތި ދޫކުރާ ކެޓަގަރީއެކެވެ.
އަލަށް ހަދާ އުސޫލުގައި ދައުލަތުން ވިސްނަމުން ދަނީ ބިންވެރިކަމެއް ނެތް އާއިލާތަކަށް ބިމެއް ހޯދައިދިނުން ކަމަށް މިނިސްޓަރު ވިދާޅުވީ އެވެ. ކޮންމެ އާއިލާއަކަށް ވަކިވަކި ޕްލޮޓްތައް ދޭން ނިންމާފައި ވަނީ ބިންވެރިޔާ ސްކީމުގެ ދަށުން އިޖުތިމާއީ މައްސަލަތައް ވެސް ކުރިމަތިވާތީ ކަމަށް މިނިސްޓަރު ވިދާޅުވި އެވެ. އާއިލީ މައްސަލަތަކާ ހެދި އެއްކޮށް ދިރިނޫޅެވޭ މީހުން ވެސް ޖޮއިންޓް އެޕްލިކޭޝަންގެ ދަށުން ގޯތި ހޯދަން އޭރު މަޖުބޫރުކުރިކަމުގެ ތުހަމަތު މިނިސްޓަރު ކުރެއްވި އެވެ.
މިނިސްޓަރު މުއްތަލިބު ވިދާޅުވީ ރޯދައިގެ ކުރިން އާންމު ކުރާ ގޯތި ދޫކުރުމުގެ އުސޫލަކީ މިހުރިހާ ކަމަށް ބަލާއި އެފަދަ އިޖްތިމާއީ މައްސަލަތަކަށް ރިއާއަތްކޮށް އާއްމު ކުރާ އުސޫލެއް ކަމަށެވެ.
