ގޯއްޗާއި ފްލެޓަށް އެދި މިހާތަނަށް 3,600 އަށް ވުރެ ގިނަ މީހުން ފޯމު ހުށަހަޅާފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.

ދައުލަތުގެ މިޑިއާއަށް މައުލޫމާތު ދެއްވަމުން މިނިސްޓަރު މުއްތަލިބް ވިދާޅުވީ، މިދިޔަ ޖެނުއަރީ މަހުގެ 18 ވަނަ ދުވަހު ހުޅުވާލި މި ފުރުސަތުގައި މިހާތަނަށް 3,651 އެޕްލިކޭޝަނެއް ފުރިހަމަކޮށް ހުށަހަޅާފައިވާ ކަމަށެވެ. މީގެ އިތުރުން، ގާތްގަނޑަކަށް 10,000 އެޕްލިކޭޝަން ޑްރާފްޓް މަރުހަލާގައި ފުރިހަމަކުރަމުންދާ ކަމަށާއި، މިހާތަނަށް އެންމެ ގިނަ މީހުން ހުށަހަޅާފައި ވަނީ ފްލެޓަށް ކަމަށްވެސް މިނިސްޓަރު ފާހަގަކުރެއްވި އެވެ.

ކޮންމެ ދިވެހި ރައްޔިތަކަށް ބޯހިޔާވަހިކަން ކަށަވަރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވައުދުފުޅެކެވެ. މި ސިޔާސަތުގެ ދަށުން މާލެ ސަރަހައްދުންނާއި ރަސްމާލެއިން 7,900 ފްލެޓާއި، 1,250 އަކަފޫޓުގެ 15,000 ގޯތި ދޫކުރުމަށް ވަނީ ނިންމާފަ އެވެ.

މި މަޝްރޫއުގެ ދަށުން ފްލެޓް ދޫކުރުމަށް 15 ކެޓަގަރީއެއް ކަނޑައަޅާފައިވެ އެވެ. އޭގެ ތެރޭގައި އެކަނިވެރި މައިންބަފައިން، ނުކުޅެދުންތެރިކަން ހުންނަ ފަރާތްތައް، ޒުވާނުން، ޓެކްސީ ޑްރައިވަރުން، ފަތުރުވެރިކަމާއި މަސްވެރިކަމުގެ ސިނާއަތުގައި މަސައްކަތްކުރާ މީހުން އަދި ޝަރުއީ ދާއިރާގެ މުވައްޒަފުން ހިމެނެ އެވެ. މީގެ އިތުރުން، ކުރީގެ މަޝްރޫއުތަކުން ފްލެޓް ލިބޭނެކަމުގެ ލިޔުން ލިބި ފްލެޓް ހަވާލުނުކުރެވި ތިބި ފަރާތްތަކަށްވެސް މި ސްކީމުގައި ފުރުސަތު ވަނީ ހުޅުވާލާފަ އެވެ.

ފްލެޓްތައް ބަހާލެވިފައިވާ ގޮތަށް ބަލާއިރު:

1. މާލޭ ރަށްވެހިންނަށް: 4,000 ފްލެޓް
2. މާލޭގައި ދިރިއުޅޭ އެހެން ރަށްރަށުގެ މީހުންނަށް: 1,500 ފްލެޓް
3. ހާއްސަ އިސްކަންދޭ ކެޓަގަރީތަކަށް: 2,400 ފްލެޓް

ގޯތި ދޫކުރުމުގެ ތެރޭގައި މާލޭގެ ރަށްވެހިންނަށް 10,000 ގޯތި، މާލޭގައި ދިރިއުޅޭ އެހެން ރަށްރަށުގެ މީހުންނަށް 3,000 ގޯތި، އަދި މައިމުޅަވެފައިވާ މީހުންނަށް 500 ގޯތި ހިމެނެ އެވެ. އަދި މާލޭގެ ހަނި ގޯޅިތަކުގައި ހުރި ގޯތިތައް ބަދަލުކުރާ ފަރާތްތަކަށް 1,500 ގޯތި ހާއްސަކޮށްފައިވެ އެވެ.

މި ސްކީމުގެ ދަށުން ބިމަށް އެދި ހުށަހެޅުމުގެ އެންމެ ފަހު ތާރީހަކީ މާޗް 5 އެވެ. އަދި ފްލެޓަށް އެދި ހުށަހެޅުމުގެ ސުންގަޑިއަކީ އޭޕްރިލް 18 އެވެ. ސަރުކާރުގެ އަމާޒަކީ ދެފުށް ފެންނަ ނިޒާމެއްގެ ތެރެއިން ހައްގުވެރިންނަށް ބޯހިޔާވަހިކަން ފޯރުކޮށްދިނުމެވެ.