މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑުގައި އަމިއްލަ ދާއިރާ ނުވަތަ ޕްރައިވެޓް ސެކްޓާ ތަމްސީލުކުރެއްވުމަށް ހާއްސަކޮށްފައިވާ ގޮނޑިތަކުގެ ތެރެއިން ހުސްވެފައިވާ މަގާމަށް ކުރިމަތިލުމުގެ ފުރުސަތު މިއަދު ހުޅުވާލައިފި އެވެ.
ޕެންޝަން އޮފީހުން މިއަދު ނެރުނު އިއުލާނެއްގައި ބުނެފައިވަނީ، އެ އޮފީހުގެ ބޯޑުގައި ޕްރައިވެޓް ސެކްޓާ ތަމްސީލުކުރައްވާ ހަތަރު މެންބަރުންގެ ތެރެއިން އެއް މަގާމު ހުސްވެފައިވާތީ، އެ މަގާމަށް ގާބިލު ބޭފުޅަކު އައްޔަނުކުރުމުގެ މަސައްކަތް ފަށާފައިވާ ކަމަށެވެ. މި މަގާމަށް ކުރިމަތިލާ ފަރާތްތަކުގެ ތެރެއިން މެންބަރަކު ހޮވުމުގެ މަސައްކަތް ކުރިއަށްދާނީ ޕެންޝަނާބެހޭ ގާނޫނުގެ ދަށުން އެކުލަވާލާފައިވާ ހާއްސަ ސިލެކްޝަން ކޮމިޓީއަކުންނެވެ.
އެ ކޮމިޓީން ކުރިމަތިލާ ފަރާތްތައް އިވެލުއޭޓް ކުރުމަށްފަހު، އެންމެ އެކަށީގެންވާ ތިން ބޭފުޅެއްގެ ނަން ޝޯޓްލިސްޓް ކުރާނެ އެވެ. އަދި އެ ބޭފުޅުންނަކީ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން ކަނޑައަޅާފައިވާ 'ފިޓް އެންޑް ޕްރޮޕާ' މިންގަނޑުތަކަށް ޝަރުތު ހަމަވާ ފަރާތްތަކެއްކަން އެ އޮތޯރިޓީން ކަށަވަރު ކުރާނެ ކަމަށްވެސް އެ އޮފީހުން ބުންޏެވެ.
މި މަގާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި، ވިޔަފާރި، އިގުތިސާދީ ނުވަތަ ގާނޫނީ ރޮނގުން ފުރަތަމަ ޑިގްރީ ހާސިލުކޮށްފައިވުމާއެކު، ޕެންޝަން ނުވަތަ އިންވެސްޓްމަންޓް ދާއިރާއިން މަސައްކަތުގެ ތަޖުރިބާ ލިބިފައިވާންޖެހެ އެވެ.
މީގެ އިތުރުން، ޕެންޝަން އޮފީހުގެ ބޯޑުގައި ޕްރައިވެޓް ސެކްޓާ ތަމްސީލުކުރައްވާ މެންބަރުންނަކީ ދައުލަތުގެ ނުވަތަ ސަރުކާރުގެ އެއްވެސް ވަޒީފާއެއް އަދާކުރައްވާ ބޭފުޅަކަށް ވެގެން ނުވާނެ އެވެ. އަދި ސަރުކާރުން 50 އިންސައްތައަށްވުރެ މަތީ އަދަދަކަށް ހިއްސާވާ އެއްވެސް ކުންފުންޏެއްގެ ނުވަތަ އެފަދަ ކުންފުންޏަކުން ކޮންޓްރޯލްކުރާ ސަބްސިޑިއަރީ ކުންފުންޏެއްގެ މުވައްޒަފަކަށްވެސް އެ ފަރާތް ވެގެން ނުވާނެ ކަމަށް އިއުލާނުގައި ބަޔާންކޮށްފައިވެ އެވެ.
މި މަގާމަށް މެންބަރުން އައްޔަނުކުރުމުގައި ޕެންޝަނާބެހޭ ގާނޫނުގައި ކަނޑައަޅާފައިވާ އެންމެހައި ކަންކަމަށް ރިއާޔަތްކުރެވޭނެ ކަމަށްވެސް ޕެންޝަން އޮފީހުން ފާހަގަކުރި އެވެ.
އެހެންކަމުން، މި މަގާމަށް ކުރިމަތިލުމަށް ޝައުގުވެރިވާ ފަރާތްތަކުން މި މަހުގެ 24 ވަނަ ދުވަހުގެ މެންދުރުފަހު 1:00 ގެ ކުރިން އެޕްލިކޭޝަން ހުށަހަޅަންޖެހެއެވެ. އެޕްލިކޭޝަން ފޮނުވާނީ އެ އޮފީހުގެ އީމެއިލް [email protected] އަށެވެ. ނުވަތަ ޕެންޝަން އޮފީހަށް ސީދާ ހުށަހެޅުމުގެ ފުރުސަތުވެސް ވަނީ ހުޅުވާލާފަ އެވެ.
