މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލެއްކަމުގައި ބަލަންޖެހޭ ކަމަށް ރައްޔިތުންގެ މަޖިލީހަށް ހުށައެޅި އިސްލާހު މަޖިލީހުގެ ތަޅުމަށް ބަލައިގެންފިއެވެ.
މި އިސްލާހު މަޖިލީހުގެ ތަޅުމަށް ބަަލައިގެންފައިވަނީ ވޯޓުގައި ބައިވެރިވި 56 މެންބަރުންގެ އިއްތިފާގުންނެވެ. މި އިސްލާހަށް ބަހުސް ކުރައްވަމުން ހިތަދޫ މެދު ދާއިރާގެ މެންބަރު އަހްމަދު އަޒާން ވިދާޅުވީ އެފަދަ ކަންކަން ނުހުއްޓުވެނީ ގާނޫނުތަކެއް ނެތިގެން ނޫން ކަމަށާއި, މިފަދަ ކަންކަމަށް މިހާރު ވެސް ގާނޫނުތައް ހެދިފައިވާ ކަމަށެވެ.
މީގެ އިތުރުން އަޒާން ވިދާޅުވީ ގާނޫނުތަކަށް އިސްލާހު ގެނައުމުގެ ބަދަލުގައި މިހާރު ހުރި ގާނޫނުތައް ރަނގަޅަށް ތަންފީޒު ކުރެވޭތޯ ބެލުން މުހިންމު ކަމަށެވެ.
Advertisement
މިއަދުގެ ބަހުސްގައި ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހިމް ވެސް ވަނީ ބައިވެރިވެ ވަޑައިގެންފައެވެ. އެގޮތުން, ގާސިމް ވެސް ވިދާޅުވީ މިސްކިތްތަކަށް ގެއްލުންދިން މީހުންނަށް ކުރީ ސަރުކާރުގައި އަދަބު ދީފައި ނުވާކަމަށާއި, ގާނޫނުގައި މިފަދަ ކަންކަމަށް ބޮޑެތި އަދަބު ދެވެންއޮށްވާ ކުރީ ސަރުކާރުން އެކަން ދޫކޮށްލައްވައިފައިވާ ކަމަށެވެ.
ޓެރަރިޒަމް މަނާކުރުމުގެ ގާނޫނުގެ ދަށުން, މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލެއް ކަމަށް ހިމެނުމަށް ގާނޫނު އިސްލާހު ކުރަން ހުށައަޅައިފައިވަނީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) އެވެ.
