ސަރުކާރުން އަލަށް ތައާރަފުކުރި ދެ ކެޓަގަރީއަކުން ގޯއްޗަށް ކުރިމަތިލުމުގެ ފުރުސަތު އަންނަ މާރިޗު މަހުގެ ތެރޭގައި ހުޅުވާލުމަށް ތައްޔާރުވަމުންދާކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުވާލެއްވުމަށް ނިންމެވި މި ފުރުސަތަކީ ބިންވެރިކަން ނެތް އާއިލާތަކަށް އެ ފުރުސަތު ހޯދައިދިނުމަށް ރައީސް ނިންމެވި ނިންމެވުމެއް ކަމަށެވެ. މިގޮތުން، "ބޯހިޔާވަހިކަން އެންމެނަށް" ސްކީމަށް އަލަށް އިތުރުކުރި މި ދެ ކެޓަގަރީގެ އުސޫލު ކުރިއަށް އޮތް ހަފްތާގެ ތެރޭގައި، ރޯދަ މަހުގެ ކުރިން އިއުލާނުކުރުމަށް ދަނީ މަސައްކަތް ކުރަމުންނެވެ.

ރައީސުލްޖުމްހޫރިއްޔާގެ ރިޔާސީ ބަޔާނުގައި ފާހަގަކުރައްވާފައިވާ ގޮތުން، އަލަށް ހުޅުވާލާ ދެ ކެޓަގަރީއަކީ:

1. އަނބިމީހާ ނުވަތަ ފިރިމީހާގެ ނަމުގައި އަމިއްލަ ބޯހިޔާވަހިކަމެއް އޮތް ނަމަވެސް، ގޯއްޗަށް ކުރިމަތިލެވޭ ކެޓަގަރީ.
2. "ބިންވެރިޔާ" ސްކީމުން ޖޮއިންޓްކޮށް ގޯތި ލިބުނު މީހުންގެ ތެރެއިން، އެންމެން ބިން ދޫކޮށްލުމަށްފަހު ވަކިން ހުށަހެޅޭ ކެޓަގަރީ.

މި ކޮންމެ ދާއިރާއަކުން 1,000 ގޯއްޗަށް ހުޅުވާލާނެ ކަމަށް ރައީސް ވަނީ ވިދާޅުވެފަ އެވެ.

މިކަމުގެ ތަފްސީލު ހިއްސާކުރައްވަމުން މިނިސްޓަރު ވިދާޅުވީ، ޖޮއިންޓްކޮށް ގޯތި ލިބުނު ފަރާތްތަކަށް ވަކިން ހުށަހެޅުމުގެ ފުރުސަތު ދޭން ނިންމީ އިޖުތިމާއީ ހަމަޖެހުމަށާއި އާއިލީ މައްސަލަތައް ކުޑަކުރުމަށެވެ. އަދި ޖޮއިންޓްކޮށް ލިބުނު ބިން އެއްކޮށް ދޫކޮށްލާގޮތަށް ހަމަޖެއްސީ، އެހެން ނޫންނަމަ ދޫކޮށްލާ ކުދި ބިންކޮޅުތަކުގެ އެކަށީގެންވާ ބޭނުން ނުހިފޭނެތީ ކަމަށްވެސް މިނިސްޓަރު ވިދާޅުވި އެވެ.

މީގެ އިތުރުން، ކުރިން ޖޮއިންޓްކޮށް ފްލެޓް ލިބިފައިވާ ދެމަފިރިންނަށް ކަންކުރެވޭނެ ގޮތްތަކެއްވެސް ބަލަމުންދާކަމަށް މިނިސްޓަރު ފާހަގަކުރެއްވި އެވެ. މިހާރު ކުރިއަށްދަނީ މި ކެޓަގަރީތަކުގެ އުސޫލުތަކާއި މާކްސް ދޭނެ މިންގަނޑުތައް ފައިނަލްކުރުމުގެ މަސައްކަތެވެ.

ސަރުކާރުގެ "ބޯހިޔާވަހިކަން އެންމެނަށް" ސިޔާސަތު އިއުލާނުކޮށްފައިވަނީ މިދިޔަ އަހަރުގެ ނޮވެމްބަރު 16 ގައެވެ. މި ސިޔާސަތުގެ ދަށުން ރަސްމާލެއިން 15,000 ގޯއްޗާއި 7,900 ފްލެޓް ދޫކުރުމަށް ވަނީ ނިންމާފަ އެވެ. މި ސްކީމްގެ ދަށުން މިހާރު ހުޅުވާލާފައިވާ ފުރުސަތުތަކުގައި ގޯއްޗަށް އެދި ހުށަހެޅުމުގެ ސުންގަޑިއަކީ މާރިޗު 4 އެވެ. އަދި ފްލެޓަށް އެދި ހުށަހެޅޭނީ އޭޕްރީލް 17 ގެ ނިޔަލަށެވެ.