ޣައްޒާ ހަނގުރާމައިގައި އިސްރާއީލުން ވަނީ ސިކުންތުކޮޅެއްގެ ތެރޭގައި އިންސާނުން އަޅިއަށް ހަދާލާ ނުރައްކާތެރި ތާމޯބަރިކް ނުވަތަ ވެކިއުމް ބޮން ބޭނުން ކޮށްފައި ކަމަށް އަލްޖަޒީރާގެ ތަޙްޤީޤުން ދައްކައިފިއެވެ.

ޣައްޒާގެ 2،842 މީހުން ވަނީ އަޅިއަށް ހަދާލާފައި ކަމަށާއި މިއީ އަންދާޒާ ކޮށްފައި ބުނާ ޢަދަދެއް ނޫން ކަމަށް ވެސް އަލްޖަޒީރާ އިން ބުނެއެވެ.

ތާމޯބަރިކް ބޮމަކީ އެހެން ބޮންތަކާއި ޚިލާފަށް އެ ބޮން ގޮވުމުން ބޮޑު އަލިފާންގަނޑެއް އުފެދޭ ބޮމެކެވެ. ޖައްވުގައި ހުންނަ އޮކްސިޖަނުން އެ އަލިފާންގަނޑު އިތުރަށް ބޮޑުވެ، ބޮޑު އަލިފާން ބޯޅައެއްހެން އުފެދޭއިރު، އެ ގަދަ ހޫނުކަން 2،500 ޑިގްރީ ސެލްސިއަސް އިން ފެށިގެން 3،500 ޑިގްރީ ސެލްސިއަސް އަށް އަރައެވެ.

ރަޝިޔާގެ އަސްކަރީ މާހިރު ވަސިލީ ފާޓިގަރޯވް ހާމަކުރެއްވި ގޮތުގައި މި ހަތިޔާރު ތަކަކީ އިންސާނުން މުޅިން އަޅިއަށް ހަދާލާ ހަތިޔާރެވެ. މި ފަދަ ބޮމެއް އަޅައިލި ތަނެއްގައި ހުރި މީހެއްގެ އެންމެ ގުނަވަނެއްވެސް ސަލާމަތް ވުމަކީ މުސްތަޙީލު ކަމެކެވެ.