ފަހި ދިރިއުޅުން ކޯޕަރޭޝަން (އެފްޑީސީ) ޓަވަރުތައް ކައިރިއަށް ކުނި އަޅާ މީހުންނަށް ފިޔަވަޅު އަޅާނެ ކަމަށް އެފްޑީސީގެ މެނޭޖިން ޑިރެކްޓާ ހަމަދާން ޝަކީލް ވިދާޅުވެއްޖެ އެވެ.

ހަމްދާން އެކްސްގައި ކުރެއްވި ޕޯސްޓެއްގައި ވިދާޅުވީ މިއީ އަޅުގަނޑުމެންގެ ދީނާއި ސަޤާފަތާ ވެސް ބީރައްޓެހި ނާތަހުޒީބު އަމަލެއް ކަމަށާއި, އެފްޑީސީން މި ކުނިތައް ނައްތައިލި ކަމުގައިވިޔަސް، އެގްރިމެންޓުގައިވާ ގޮތާ ހިލާފަށް ކުނިއަޅަމުންދާ ފަރާތްތަކާމެދު ފިޔަވަޅު އަޅަމުންދާނެ ކަމަށެވެ.

"ހޮނިހިރު ދުވަހު ސާފުކުރި ތަންތަނަށް މިއަދު އޮތީ ކުނި އަޅާފައި. ތިމާ ދިރިއުޅޭ މާޙައުލަށް މި ގޮތަށް ކުނިއެޅުމަކީ އެކިއެކި ބަލިތަކަށް ހުޅުވާލެވޭ ދޮރެއް," އެފްޑީސީގެ އެމްޑީ ހަމްދާން ޝަކީލް ވިދާޅުވި އެވެ.

މީގެ އިތުރުން ހަމްދާން ވަނީ ގަވައިދާ އެއްގޮތަށް ބަލްކް ވޭސްޓް ނައްތައިލަމުން ގެންދާ ފަރާތްތަކަށް ޝުކުރު އަދާކޮށްފަ އެވެ. އަދި ފްލެޓުތަކުގައި ދިރިއުޅުއްވާ ފަރާތްތަކަށް އަމާން ސާފު ވެއްޓެއް ގާއިމް ކުރެވޭނީ އެންމެެންގެ އެއްބާރުލުމާއި އެކުކަން ވެސް ހަމްދާން ވަނީ ފާހަގަކުރައްވާފަ އެވެ.

ފަހި ދިރިއުޅުން ކޯޕަރޭޝަން (އެފްޑީސީ)ގެ 4000 ފްލެޓުގެ ތެރެއިން 200 ފްލެޓު ފިޔަވައި އެހެން ފްލެޓުތަކަށް މީހުން ބަދަލުވުމުގެ މަސައްކަތް ކުރަމުން އަންނަ އިރު, ފްލެޓްތަކުގެ ކޮރިޑޯގެ އިތުރުން ގްރައުންޑް ފްލޯގެ ލިފްޓު ކައިރީގައި ވެސް ވަނީ ކުނި ގިނަވެފައެވެ. އެ ސަރަހައްދުގެ ބައެއް ފޮޓޯތަކުން ފެންނަ ގޮތުގައި, އެ ސަރަހައްދު ފުރިފައިވަނީ އޭސީ، އައިސް އަލަމާރި, ފަރުނީޗަރު އަދި ތެލި ތަށި ފަދަ އެތައް ސާމާނެއް ހުސްކޮށްފައިވާ ފޮށިތަކުންނެެވެ. އަދި އޭގެ ތެރޭގައި ކުނިވާ ޒާތުގެ ކުނިވެސް ހިމެނެއެވެ.