ކުރިއަށް ރަމަޟާން މަހު ތިނަދޫ ސިޓީގައި އެއްވެސް ބާވަތެއްގެ މުނިފޫހިފިލުވުމުގެ ހަރަކާތްތަކާއި ކުޅިވަރު މުބާރަތްތައް ބޭއްވުމަކީ މަނާކަމެއް ކަމަށް ތިނަދޫ ސިޓީ ކައުންސިލުން ނިންމައިފި އެވެ.
ތިނަދޫ ސިޓީ ކައުންސިލުގެ މި ނިންމުމަކީ، ކުރިއަށް އޮތް ރަމަޟާން މަހުގެ ހުރިހާ ވަގުތެއް އަޅުކަމަށް މަގުފަހިކުރުމުގެ ގޮތުން ނިންމި ނިންމުމެކެވެ. ތިނަދޫ ސިޓީ ކައުންސިލުން ނެރުނު އިއުލާނުގައި ބުނީ، ރަމަޟާން މަހަކީ އަޅުކަމަށް މަގުފަހިވެ، އިސްލާމީ ރިވެތި އާދަކާދަތައް އާލާވާ ފަދަ ދުވަސްތަކަކަށް ހެދުމަށް ކައުންސިލުން ކުރަންޖެހޭ މަސައްކަތްތައް ކުރަމުން އަންނަ ކަމަށެވެ.
ވޭތުވެދިޔަ އަހަރުތަކުގައި ވެސް ރަމަޟާން މަހު ތިނަދޫ ސިޓީގެ ރައްޔިތުންގެ ފަރާތުން ފެނިފައިވާ ރިވެތި މިސާލަށް ޝުކުރު އަދާކުރަމުން އެ ސިޓީގެ ކައުންސިލުން ވަނީ، ރަމަޟާން މަހުގެ މާތްކަން ހިފެހެއްޓުމަށްޓަކައި މުހިންމު އިލްތިމާސްތަކެއް ކޮށްފައެވެ.
އެގޮތުން:
- ތައުލީމީ މަރުކަޒުތަކާއި، މުއައްސަސާތަކާއި، ޖަމުއިއްޔާ ޖަމާއަތްތަކުން ކުރާ ހުރިހާ ކަމެއް ރަމަޟާން މަހުގެ މަގްސަދު ހާސިލުވާނޭހެން ތަރުތީބުކުރުން
- ފަރުޟު ނަމާދުތަކާއި، ތަރާވީހް ނަމާދު އަދި ރޯދަވީއްލާ ވަގުތުތަކަށް ބުރުލެއް ނާރާނޭހެން ރަސްމީ އަދި ނުރަސްމީ މަސައްކަތްތައް އިންތިޒާމްކުރުން
- ދުވާލާއި ރޭގަނޑުގެ ވަގުތުގައި ވެސް އެއްވެސް ބާވަތެއްގެ ކުޅިވަރު ނުވަތަ މުނިފޫހިފިލުވުމުގެ ހަރަކާތެއް ތިނަދޫ ސިޓީގައި ނުހިންގުން
- ކޮންމެހެން ހިންގަންޖެހޭ ދީނީ ނުވަތަ ރަސްމީ ހަރަކާތެއް ފިޔަވައި އެހެން އެއްވެސްކަމެއް ނުބޭއްވުމާއި، ބާއްވާ ހަރަކާތްތަކުގެ މައުލޫމާތު ކައުންސިލާ ހިއްސާކުރުން
ތިނަދޫ ސިޓީ ކައުންސިލުން އިތުރަށް ބުނީ، ރައްޔިތުންގެ ކަސްރަތާއި ސިއްހީ ބޭނުންތަކަށްޓަކައި ރަށުގައި ހުރި ކުޅިވަރު މައިދާންތަކާއި، ދަނޑުތަކާއި ޓްރެކްތައް ކަނޑައެޅޭ ވަގުތުތަކެއްގައި ހުޅުވާފައި ހުންނާނެ ކަމަށެވެ. މި ތަންތަން ހުޅުވާފައި ހުންނާނެ ގަޑިތައް ފަހުން އިއުލާނު ކުރާނެ ކަމަށްވެސް ކައުންސިލުން ވަނީ ބުނެފަ އެވެ.
ތިނަދޫ ސިޓީ ކައުންސިލް ބުނީ، ކައުންސިލުގެ މި އިރުޝާދުތަކާ ހިލާފުވާ ފަރާތްތަކަށް ކައުންސިލްގެ އެއްވެސް އެއްބާރުލުމެއް ނުލިބޭނެ ކަމަށެވެ. މީގެ އިތުރުން އުސޫލުތަކާ ހިލާފުވާ ފަރާތްތަކާމެދު ފިޔަވަޅު އަޅާނެކަމުގެ އިންޒާރު ވެސް ތިނަދޫ ސިޓީ ކައުންސިލުން ވަނީ ދީފަ އެވެ.
