ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި، މިހާރު ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލާން ބޭނުންވާ ފަރާތްތަކަށް ރީ-ރަޖިސްޓަރީ ވުމުގެ ފުރުސަތު މާދަމާ ހުޅުވާލުމަށް އިލެކްޝަންސް ކޮމިޝަނުން ނިންމައިފި އެވެ.

އިލެކްޝަންސް ކޮމިޝަނުން ބުނި ގޮތުގައި، 2026 ވަނަ އަހަރުގެ އެޕްރީލް މަހުގެ 4 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ މި އިންތިހާބަށް ރީ-ރަޖިސްޓަރީ ވުމުގެ ފުރުސަތު ހުޅުވާލަނީ މާދަމާ ހެނދުނު 10:00 އިން ފެށިގެން މިމަހުގެ 16 ވާ ހޯމަ ދުވަހުގެ މެންދުރުފަހު 3:00 ގެ ނިޔަލަށެވެ.

މި މުއްދަތުގައި ރީ-ރަޖިސްޓަރީ ވުމަށް އެދި ހުށަހަޅަން ޖެހޭނީ އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި ވޯޓުލުމަށް ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލާން ބޭނުންވާ ފަރާތްތައް އެކަނި ކަމަށް ކޮމިޝަނުން ބުންޏެވެ. އަދި މަޖިލިސް އިންތިޚާބުގައި ރިސޯޓު، ސިނާއީ ރަށްރަށް، ޖަލު ނުވަތަ ރާއްޖެއިން ބޭރުގައި ވޯޓުލާން ރަޖިސްޓަރީކުރި މީހުން، މި އިންތިޚާބުގައި ރަޖިސްޓަރީވެފައި އޮންނާނީ އެމީހެއްގެ ދާއިމީ އެޑްރެހަށް ކަމަށްވެސް ކޮމިޝަނުން ފާހަގަކުރި އެވެ.

ރީ-ރަޖިސްޓްރޭޝަން ކުރިއަށްދާނީ އިލެކްޝަންސް ކޮމިޝަނުގެ 'ރީ-ރަޖިސްޓްރޭޝަން ޕޯޓަލް' (form.elections.gov.mv) ނުވަތަ 'މައި ޕޯޓަލް' (my.elections.gov.mv) މެދުވެރިކޮށް އޮންލައިންކޮށެވެ. 'ރީ-ރަޖިސްޓްރޭޝަން ޕޯޓަލް' މެދުވެރިކޮށް ހުށަހަޅާއިރު ކާކުކަން އަންގައިދޭ ރަސްމީ ލިޔުމެއްގެ ކޮޕީއާއި ފޮޓޯ ބޭނުންވާނެ އެވެ. ނަމަވެސް، ވެރިފައިޑް އީފާސް އެކައުންޓަކުން 'މައި ޕޯޓަލް' މެދުވެރިކޮށް ހުށަހަޅާއިރު މި ލިޔުންތައް ހުށަހަޅާކަށް ނުޖެހޭނެ އެވެ.

އިތުރު މައުލޫމާތު ބޭނުންވާ ފަރާތްތަކަށް 1414 އަށް ގުޅުއްވައިގެން ނުވަތަ އިންތިހާބާބެހޭ މަރުކަޒަށް ވަޑައިގެން މައުލޫމާތު ސާފުކުރެއްވޭނެ އެވެ. މިހާރު ރަޖިސްޓަރީވެފައިވާ ތަން ބަލަން ބޭނުންނަމަ VR (space) ID Card Number ޖެއްސެވުމަށްފަހު 1414 އަށް އެސްއެމްއެސް ކޮށްގެން ނުވަތަ ކޮމިޝަނުގެ ވެބްސައިޓް މެދުވެރިކޮށް ބައްލަވާލެއްވޭނެކަަމަށްވެސް އެ ކޮމިޝަނުން ބުންޏެވެ.