ކުރިއަށް އޮތް ލޯކަލް ކައުންސިލް އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ވޯޓު ނެގުމާއި ވޯޓު ގުނުމުގެ ކަންތައްތައް އޮބްޒާވްކުރުމާއި މޮނިޓަރަކަށް ވުމަށް އެދި ހުށަހެޅުމުގެ ފުރުސަތު އިލެކްޝަންސް ކޮމިޝަނުން މިއަދު ހުޅުވާލައިފި އެވެ.
އިލެކްޝަންސް ކޮމިޝަނުން ބުނި ގޮތުގައި، އޮބްޒާވަރުންނާއި މޮނިޓަރުންނަށް ވުމަށް އެދި ހުށަހެޅުމުގެ ސުންގަޑިއަކީ ފެބްރުއަރީ މަހުގެ 28 ވާ ހޮނިހިރު ދުވަހުގެ މެންދުރުފަހު 15:00 އެވެ. މިކަމަށް އެދި ހުށަހަޅާ ފޯމުތައް ބަލައިގަތުމަށް ހަމަޖެހިފައިވަނީ އެ ކޮމިޝަންގެ 'މައި އިލެކްޝަންސް' (my.elections.gov.mv) ޕޯޓަލް މެދުވެރިކޮށެވެ.
މި ފުރުސަތުގައި އަމިއްލަ ގޮތުން ނުވަތަ ޖަމިއްޔާތަކުން އޮބްޒާވަރުންނާއި މޮނިޓަރުންނަށް ވުމަށް ހުށަހަޅާ ފަރާތްތަކަކީ އެއްވެސް ސިޔާސީ ޕާޓީއެއްގެ ދަފުތަރުގައި ހިމެނޭ ފަރާތްތަކަކަށް ވެގެން ނުވާނެ އެވެ. ނަމަވެސް، ސިޔާސީ ޕާޓީތަކުން އޮބްޒާވަރުން ހުށަހަޅާނަމަ، އެކަމަށް ހާއްސަކޮށްފައިވާ "ސިމެދަ ޕޯޓަލް" މެދުވެރިކޮށް ހުށަހެޅޭނެއެވެ. އޮބްޒާވަރުންގެ ފަރާތުން ސުލޫކީ މިންގަނޑަށް އިގުރާރުވުމުގެ ކަންކަންވެސް ކުރިއަށްދާނީ 'މައި އިލެކްޝަންސް' ޕޯޓަލް މެދުވެރިކޮށެވެ.
މީޑިއާތަކުން މޮނިޓަރުންގެ ގޮތުގައި ކުރިމަތިލާއިރު، ހަރަކާތްތެރިވާނެ ފަރާތްތަކުގެ މައުލޫމާތުގެ އިތުރުން، އެ މީޑިއާއެއްގެ ރަޖިސްޓްރީ ލައިސަންސްގެ މައުލޫމާތު ހުށަހަޅަންޖެހެ އެވެ.
އޮބްޒާވަރުންނާއި މޮނިޓަރުން ހުށަހެޅޭނެ އަދަދުތަކާ ގުޅޭގޮތުން އިލެކްޝަނުން ބުނީ، މީޑިއާތަކަށް މޮނިޓަރުންގެ ގޮތުގައި ހިމެނޭނީ ބަހައްޓާ ވޯޓު ފޮށީގެ އަދަދަށް ކަމަށެވެ. އެއީ 621 މޮނިޓަރުންނެވެ. އަދި ޕާޓީތަކާއި ޖަމިއްޔާތަކުން ހުށަހަޅާ އޮބްޒާވަރުންގެ އަދަދު، ވޯޓު ފޮށީގެ އަދަދަށްވުރެ %10 އިތުރުވެގެން ނުވާނެކަމަށް ވާއިރު އެއީ ގިނަވެގެން 683 ފަރާތްކަމަށް އިލެކްޝަނުން ބުންޏެވެ.
އޮބްޒާވަރުންނާއި މޮނިޓަރުންގެ ގޮތުގައި ހަމަޖެހޭ ފަރާތްތަކަށް އެކަން އެސްއެމްއެސް އަދި ޕޯޓަލް މެދުވެރިކޮށް އަންގާނެ އެވެ. އަދި އިންތިހާބުގެ ކަންކަމުގައި ހަރަކާތްތެރިވުމަށް ބޭނުންވާ ފާސްވެސް ޕޯޓަލް މެދުވެރިކޮށް ޑައުންލޯޑް ކުރެވޭނެ އިންތިޒާމު ހަމަޖެހިގެންދާނެ ކަމަށް އިލެކްޝަންސް ކޮމިޝަނުން ފާހަގަކުރި އެވެ.
