ފަލަސްޠީނުގެ ކުޑަކުދިންނާއި އަންހެނުން ޤަތުލުކުރަމުންދާ އިސްރާއީލުން ވިންޓާ އޮލިމްޕިކްސްގައި ކުޅެވޭތީވެ، އެކަމާއި ދެކޮޅަށް ރޭ އިޓަލީގެ މިލާނުގައި ބޮޑެތި ހަމަނުޖެހުންތަކެއް ހިނގައިފިއެވެ.
ސްކޫލް ޔުނިވާސިޓީތަކާއި ދަރިވަރުންގެ އެކިއެކި ޖަމިއްޔާތައް ގުޅިގެން ރޭ މިލާނުގެ މަގުތަކަށް އެއްވެ، އިސްރާއީލާއި ދެކޮޅަށް އަޑު އުފުލައި، ޔަހޫދީ ސަރުކާރުން ފޮނުވި ޓީމު ވަގުތުންވަގުތަށް އިޓަލީގެ ފަސްގަނޑުން ބޭރު ކުރުމަށް ވެސް ގޮވައިލިއެވެ.
ވިންޓާ އޮލިމްޕިކްސް 2026 ރަސްމީކޮށް ފެށީ މި މަހުގެ ހަވަނަ ދުވަހުގައެވެ. މި މަހުގެ 22 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި 90 އަށް ވުރެ ގިނަ ގައުމު ބައިވެރިވާއިރު، ގާތްގަނޑަކަށް 2،900 އެތުލީޓުން (116 އަށް ވުރެ ގިނަ އިވެންޓްގައި) ވާދަކުރެއެވެ.
އިސްރާއީލުގެ 9 އެތުލީޓުން މިލާނުގައި އެބަތިއްބެވެ.
