މިއަހަރުގެ މިހާތަނަށް ދިވެހިރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ ޗައިނާ އަދި ރަޝިއާއިން ކަމަށް މިނިސްޓްރީ އޮފް ޓޫރިޒަމްގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން މިއަދު އާންމުކޮށްފައިވާ ރިޕޯޓަށް ބަލާއިރު، ރާއްޖޭގެ ފަތުރުވެރިކަމުގެ މާކެޓުގެ އެއްވަނައިގައި އޮތީ ޗައިނާއެވެ. އަދި ދެވަނައިގައި ރަޝިއާ އޮތްއިރު، ތިންވަނައިގައި އޮތީ އިނގިރޭސިވިލާތެވެ. މީގެ އިތުރުން އިޓަލީ، ޖަރުމަނުވިލާތް އަދި އިންޑިއާއަކީވެސް ރާއްޖެއަށް ގިނަ އަދަދަކަށް ފަތުރުވެރިން ޒިޔާރަތްކުރާ ގައުމުތަކުގެ ގޮތުގައި ވަނީ ފާހަގަކުރެވިފައެވެ.
އެގޮތުން ޗައިނާއިން މިހާތަނަށް 35،123 ފަތުރުވެރިން ޒިޔާރަތްކޮށްފައިވާއިރު، ރަޝިއާއިން 35،112 ފަތުރުވެރިން ޒިޔާރަތްކޮށްފައިވެ އެވެ. އަދި އިޓަލީ އިން 28،676 ފަތުރުވެރިން ޒިޔާރަތްކުރިއިރު ހަތަރު ވަނައިގައި އޮތް އިނގިރޭސީވިލާތުން ޒިޔާރަތްކޮށްފައިވަނީ 26،285 ފަތުރުވެރިންނެވެ. ޖަރުމަންވިލާތު ފަސް ވަނައިގައި އޮތީ 17،390 ފަތުރުވެރިން ޒިޔާރަތްކޮށްގެނެވެ.
ރާއްޖޭގެ ފަތުރުވެރިކަން ކުރިއެރުވުމަށް ބައިނަލްއަގުވާމީ ފެންވަރުގައި ކުރަމުންދާ މަސައްކަތްތަކުގެ ނަތީޖާއެއްގެ ގޮތުން މި އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ އަދަދު ވަނީ މިދިޔަ އަހަރުގެ މި މުއްދަތާ އަޅާބަލާއިރު އިތުރުވެފައެވެ. މިއަހަރުގެ މިހާތަނަށް ޖުމްލަ 270،706 ފަތުރުވެރިން ރާއްޖެ ޒިޔާރަތްކޮށްފައިވާއިރު މިދިޔަ އަހަރު މި މުއްދަތުގައި ޒިޔާރަތްކޮށްފައިވަނީ 243،918 ފަތުރުވެރިންނެވެ.
ސަރުކާރުގެ އަމާޒަކީ ރާއްޖޭގެ ފަތުރުވެރިކަން އާ މާކެޓްތަކަށް ފުޅާކޮށް، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އަހަރަކަށްވުރެ އަހަރެއް އިތުރުކުރުމެވެ. މި މަސައްކަތުގައި ޓޫރިޒަމް މިނިސްޓްރީއާއި އެމް.އެމް.ޕީ.އާރު.ސީ އިން ދަނީ ގުޅިގެން ގިނަ ހަރަކާތްތަކެއް ހިންގަމުންނެވެ. ޓޫރިޒަމް މިނިސްޓްރީން އަންދާޒާކުރަނީ މިއަހަރުގެ ނިޔަލަށް 2.2 މިލިއަން ފަތުރުވެރިން ރާއްޖެ ޒިޔާރަތް ކުރުމެވެ. މިދިޔަ އަހަރު ޒިޔާރަތްކޮށްފައިވަނީ ދެ މިލިއަން ފަތުރުވެރިންނެވެ.
