ރާއްޖެއިން ގަބޫލުކުރާ ޓެރަރިސްޓް ޖަމާއަތްތަކުގެ ލިސްޓުން ސީރިއާގައި ވެރިކަންކުރާ ހަޔާތު ތަހްރީރު އަލް ޝާމް (އެޗްޓީއެސް)ގެ ނަން އުނިކޮށް، ދިވެހިންނަށް ސީރިއާއަށް ދަތުރުކުރުމުގެ ހުއްދަ ދީފި އެވެ.

ޓެރަރިޒަމް މަނާކުރުމުގެ ގާނޫނުގެ ދަށުން، ކޮންމެ އަހަރަކު އެއްފަހަރު ރާއްޖެއިން ގަބޫލުކުރާ ޓެރަރިސްޓް ޖަމާއަތްތަކުގެ ލިސްޓާއި، ދިވެހިން ދަތުރުކުރުން މަނާވާ ހަނގުރާމަވެރި ސަރަހައްދުތަކުގެ ލިސްޓެއް އެކުލަވާލަންޖެހެ އެވެ. އެގޮތުން އެޗްޓީއެސްއަކީ ޓެރަރިސްޓް ޖަމާއަތެއް ކަމަށް ކަނޑައަޅައި، 2019 ވަނަ އަހަރުން ފެށިގެން ދިވެހިން ސީރިއާއަށް ދަތުރުކުރުން އޮންނަނީ މަނާކޮށްފަ އެވެ.

އެޗްޓީއެސްއިން ސީރިއާގެ ކުރީގެ ރައީސް ބައްޝާރުލްއައްސަދުގެ ވެރިކަން ވައްޓާލި ފަހުން މިދިޔަ އަހަރު ރާއްޖެއިން ޓެރަރިސްޓް ޖަމާއަތްތަކުގެ ލިސްޓް އެކުލަވާލިއިރު ވެސް އެ ޖަމާއަތުގެ ނަން އޮތްކަން ފާހަގަކޮށްލެވެ އެވެ. އެޗްޓީއެސްގެ ނަން ޓެރަރިސްޓް ޖަމާއަތްތަކުގެ ލިސްޓުން ރާއްޖެއިން އުނިކޮށްފައި މިވަނީ ދުނިޔޭގެ ނުފޫޒުގަދަ ގިނަ ގައުމުތަކަކުން، އެ ޖަމާއަތް ބަލައިގަންނަމުންދާ ދަނޑިވަޅެއްގަ އެވެ.

ރައީސް އޮފީހުން މިދިޔަ ބުރާސްފަތި ދުވަހު ވަނީ އެ ލިސްޓު އަލުން އެކުލަވާލައި ސަރުކާރުގެ ގެޒެޓްގައި ޝާއިއުކޮށްފަ އެވެ. މި ލިސްޓު ގައުމީ ސަލާމަތާ ބެހޭ މަޖިލީހުގެ އިރުޝާދުގެ ދަށުން ބަލަހައްޓަނީ އެމްއެންޑީއެފްއިންނެވެ.

ހަޔާތު ތަހްރީރު އަލް ޝާމް (އެޗްޓީއެސް) އަކީ ސީރިއާގައި ހަރަކާތްތެރިވާ ހަނގުރާމަވެރި ޖަމާއަތެކެވެ. ސީރިއާގައި މިހާރު ވެރިކަންކުރަމުން އަންނަނީ މި ޖަމާއަތުންނެވެ. އެޗްޓީއެސްއިން ސީރިއާގެ ވެރިކަމާ ހަވާލުވެފައިވަނީ، 2024 ވަނަ އަހަރު އެ ގައުމުގެ ކުރީގެ ރައީސް ބައްޝާރުލްއައްސަދުގެ ވެރިކަން ވައްޓައިލުމަށްފަހުގަ އެވެ.