ދިވެހިރާއްޖޭގެ ހައިކޯޓުގެ ފަނޑިޔާރުކަމަށް ދެ ބޭފުޅަކު އަދި ކްރިމިނަލް ކޯޓުގެ ފަނޑިޔާރުކަމަށް ބޭފުޅަކު އައްޔަންކޮށްފި އެވެ. 

ހައިކޯޓުގެ ފަނޑިޔާރުކަމަށް އައްޔަންކުރީ އަބްދުލްރައޫފު އިބްރާހީމް އާއި އިސްމާއިލް ޝަފީއު އެވެ. ކްރިމިނަލް ކޯޓުގެ ފަނޑިޔާރުކަމަށް އައްޔަންކުރެއްވީ އަހްމަދު ނިޔާޒު އެވެ. މި ބޭފުޅުން މަގާމުގެ ހުވައި ކުރެއްވުމުގެ ރަސްމިއްޔާތު އޮތީ ދިވެހިރާއްޖޭގެ ސުޕްރީމް ކޯޓުގައެވެ. މަގާމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު އަބްދުﷲ ހަމީދު އެވެ.

ހައިކޯޓަށް އައްޔަންކުރި އަބްދުލްރައޫފު އިބްރާހީމަކީ މީގެ ކުރިންވެސް ހައިކޯޓުގެ ފަނޑިޔާރުކަން ކުރައްވާފައިވާ ބޭފުޅެކެވެ. އޭނާ ވަނީ 2011 އިން 2022 އަށް އެ ކޯޓުގެ ފަނޑިޔާރުކަން ކުރައްވާފަ އެވެ. އަލުން ހައިކޯޓަށް އައްޔަންކުރެވުނު އިރު އޭނާ ހުންނެވީ މޯލްޑިވްސް ޕޯޓްސް ލިމިޓެޑްގެ ސީނިއާ ލީގަލް ކައުންސެލްގެ މަގާމުގަ އެވެ. އަބްދުލްރައޫފަކީ ޝަރުއީ ދާއިރާގައި 16 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ ބޭފުޅެކެވެ.

ހައިކޯޓަށް ދެން އައްޔަންކުރެއްވި އިސްމާއިލް ޝަފީއު މީގެ ކުރިން ހުންނެވީ ކްރިމިނަލް ކޯޓުގެ ފަނޑިޔާރުގެ މަގާމުގަ އެވެ. އޭނާ ވަނީ ޕްރޮސެކިއުޓާ ޖެނެރަލްގެ އޮފީހުގެ ޕަބްލިކް ޕްރޮސެކިއުޓަރުގެ މަގާމުވެސް ފުރުއްވާފަ އެވެ. އިސްމާއިލް ޝަފީއު ވަނީ އިނގިރޭސިވިލާތުގެ ކާޑިފް ޔުނިވަސިޓީން ގާނޫނީ ދާއިރާއިން ފުރަތަމަ ޑިގްރީ ހާސިލްކުރައްވާފަ އެވެ.

ކްރިމިނަލް ކޯޓަށް އައްޔަންކުރެއްވި އަހްމަދު ނިޔާޒަކީ ޝަރުއީ ދާއިރާގައި 12 އަހަރަށްވުރެ ގިނަ ދުވަހު މަސައްކަތް ކުރައްވާފައިވާ ބޭފުޅެކެވެ. އޭނާ މި މަގާމަށް އައްޔަންކުރެވުނު އިރު ހުންނެވީ ލ. ކަލައިދޫ މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަގާމުގަ އެވެ. އަހްމަދު ނިޔާޒު ވަނީ ވިލާ ކޮލެޖުން ގާނޫނީ ދާއިރާއިން ބެޗްލާ އޮފް ލޯ ހާސިލްކުރައްވާފަ އެވެ.