އިއްޔެ ހުކުރު ނަމާދު ކުރަނިކޮށް އިސްލާމްއާބާދުގެ ދެކުނު ސަރަޙައްދާއި ކައިރީގައިވާ ޝީޢީންގެ މިސްކިތަކަށް ދިން ޖާނުން ފިދާވުމުގެ ޙަމަލާ އެއްގައި 31 މީހުން މަރުވެ 169 ވަރަކަށް މީހުން ޒަޚަމްވެއްޖެއެވެ. މިއީ ފާއިތުވި ދިހަވަރަކަށް އަހަރުގެ ތެރޭގައި އިސްލާމްއާބާދާއި މިހާ ކައިރިން ދިން މިފަދަ އެންމެ ނުރައްކާތެރި ޙަމަލާ ކަމަށް ޕާކިސްތާނުން ބުނެއެވެ.
ޕާކިސްތާނުގެ ކަމާބެހޭ ފަރާތްތަކުން ވަނީ މި ހަމަލާ އާއި ގުޅިގެން މިހާތަނަށް ހަތަރު މީހަކު ހައްޔަރު ކޮށްފައެވެ. އެ ޤައުމުގެ ފުލުހުން ބުނީ އޭގެތެރެއިން އެކަކީ ޙަމަލާގެ މޭސްތިރިޔާ ކަމަށް ބެލެވޭ އަފްޣަނިސްތާނު މީހެކެވެ.
މި ހަމަލާގެ ޒިންމާ އިސްލާމިކް ސްޓޭޓް (އައިއެސް) އާއި ގުޅުންހުރި ބަޔަކު ނަގާފައެވެ.
