އައްޑޫ ސިޓީގެ ހިތަދޫ ވިޔަފާރި ބަނދަރުގެ ހިދުމަތްތައް ފުޅާކުރުމުގެ ގޮތުން، އެ ބަނދަރުގައި ބޮންޑެޑް ވެއާހައުސްއާއި ފްރީޒޯންގެ ހިދުމަތް ގާއިމުކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު އެއްބަސްވުމެއްގައި ސޮއިކޮށްފި އެވެ.

ހިތަދޫ ޕޯޓުގައި ބޭއްވި މި ރަސްމިއްޔާތުގައި އެމްޕީއެލްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ސީއީއޯ، ޑީސީޕީ ރިޓަޔާޑް މުހައްމަދު ރިޝަވާނެވެ. އަދި އިކޮނޮމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުހައްމަދު ސައީދު އެވެ.

މިއަދު ސޮއިކުރެވުނު މި އެއްބަސްވުމުގެ ދަށުން ހިތަދޫ ބަނދަރުގައި ތިން މުހިންމު މަޝްރޫއެއް ކުރިއަށް ގެންދިއުމަށް ވަނީ ނިންމާފައެވެ. އޭގެ ތެރޭގައި ފްރީޒޯނެއް ތަރައްގީ ކުރުމުގެ މަސައްކަތާއި، ބޮންޑެޑް ވެއާހައުސްގެ ހިދުމަތް ގާއިމުކުރުމުގެ އިތުރުން ބަލްކް ކާގޯ ފެސިލިޓީއެއް ތަރައްގީކުރުން ހިމެނެ އެވެ.

މި މަޝްރޫއުތަކުގެ ތެރެއިން އެންމެ މުހިންމު ހިދުމަތެއްގެ ގޮތުގައި އެމްޕީއެލް އިން ފާހަގަކުރަނީ ފްރީޒޯންގެ ހިދުމަތެވެ. މިއީ އިމްޕޯޓް ޑިއުޓީ ނުދައްކައި ކާޑުގެ ބާވަތްތަކާއި، ކާބޯތަކެތި އަދި އެހެނިހެން މުދާ ރައްކާތެރިކަމާއެކު ގުދަންކޮށްފައި ބެހެއްޓޭނެ އިންތިޒާމެކެވެ. މި ޒޯންގެ ސަބަބުން ދެކުނުގެ ސަރަހައްދުގައި ވަރަށް ކުޑަ އަގެއްގައި މުދާ ބެހެއްޓޭނެ މަގު ތަނަވަސްވެ، މުދަލުގެ އަގު ހެޔޮކުރުމަށް ބޮޑު އެހީތެރިކަމެއް ލިބިގެންދާނެ އެވެ.

އެމްޕީއެލް އިން ބުނީ، އަލަށް ގާއިމުކުރެވޭ ބޮންޑެޑް ވެއާހައުސްއާއެކު ވިޔަފާރިވެރިންނަށް، ވަކިން ހާއްސަކޮށް ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ބޮޑެތި ފަސޭހަތަކަކާއި ލުއިތަކެއް ލިބިގެންދާނެ ކަމަށެވެ. މީގެ ސަބަބުން ރިސޯޓުތަކަށް ބޭނުންވާ ތަކެތި ފަސޭހައިން ރައްކާކޮށް ބެލެހެއްޓޭނެ ނިޒާމެއް އައްޑޫ ސިޓީގައި ގާއިމުވެގެންދާނެއެވެ.

އަތޮޅުތަކުގެ އިގްތިސާދު ވަރުގަދަކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ކުރިއަށްގެންދާ މި މަޝްރޫއަކީ، ދެކުނުގެ ވިޔަފާރިތަކަށް އިންގިލާބީ ބަދަލެއް ގެނުވާނެ މަޝްރޫއެކެވެ.