ރާއްޖޭގެ އެކި ކަންކޮޅުތަކުގައި ސަރުކާރުން ހުޅުވާ އައިނު ފިހާރާ، އައްޑޫ ސިޓީ ހިތަދޫގައި ރަސްމީކޮށް ހުޅުވައިފިއެވެ.
މި އައިނު ފިހާރަ ހުޅުވުމުގެ މައިގަނޑު މަގްސަދަކީ އައްޑޫ ސިޓީގެ ރައްޔިތުންނަށް ލޮލުގެ ފަރުވާއާއި އައިނު ހޯދުމުގައި ކުރިމަތިވާ ދަތިތަކަށް ހައްލެއް ހޯދައިދިނުމެވެ. އަދި ހެޔޮ އަގުގައި ފެންވަރު ރަނގަޅު އައިނު ލިބޭނެ އިންތިޒާމު ހަމަޖައްސައިދިނުމަކީވެސް މި މަޝްރޫޢުގެ ބޭނުމެކެވެ.
މި ހިދުމަތް އިފްތިތާހްކޮށްދެއްވީ މިކަމަށްޓަކައި ހިތަދޫގައި ބޭއްވުނު ހާއްސަ ރަސްމިއްޔާތެއްގަ އެވެ. މި ފިހާރަ މެދުވެރިކޮށް އާސަންދައިގެ ދަށުން އައިނު ހެއްދުމުގެ ފުރުސަތު އާންމުންނަށް ލިބިގެންދާނެ އެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ރާއްޖޭގެ ސިއްހީ ދާއިރާ ހަރުދަނާކޮށް، ހިދުމަތްތައް ލާމަރުކަޒީ ކުރުމަށް ކުރަމުންދާ މަސައްކަތުގެ ދަށުން ކުރިއަށް ގެންދެވުނު މުހިންމު މަސައްކަތެކެވެ. އެގޮތުން ހެޔޮ އަގުގައި އައިނު ހެއްދުމުގެ ފުރުސަތު ފަހިކުރުމުގެ ގޮތުން ސަރުކާރުގެ ފަރާތުން އެ ހިދުމަތް ފޯރުކޮށްދެއްވަން ނިންމެވީ ރައީސް ޑރ. މުއިއްޒު އެވެ.
Advertisement
މި ފިހާރަ ހުޅުވުމާއެކު، އައްޑޫގެ ރައްޔިތުން މާލެ ނުގޮސް އަމިއްލަ ރަށުގައި ތިބެގެން ފެންވަރު ރަނގަޅު އައިނު ހޯދުމުގެ މަގު ތަނަވަސްވެގެންދާނެ އެވެ.
އައްޑޫ އިކުއެޓޯރިއަލް ހޮސްޕިޓަލް (އޭއީއެޗް) ގައި ގާއިމްކުރެވުނު މި އައިނު ފިހާރައާއެކު މިއީ މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖިީއެޗް) ގެ ފަރާތުން ރާއްޖޭގައި ގާއިމްކުރި ތިން ވަނަ އައިނު ފިހާރަ އެވެ. މީގެ ކުރިން އައިޖީއެމް ހޮސްޕިޓަލާއި ހުޅުމާލެ ހޮސްޕޮޓަލުގައި އައިނު ފިހާރަ ވަނީ ގާއިމްކޮށްފަ އެވެ.
ސަރުކާރުގެ އަމާޒަކީ މިފަދަ ހިދުމަތްތައް ރާއްޖޭގެ އެހެން ސަރަހައްދުތަކަށްވެސް ފުޅާކޮށް، ރައްޔިތުންނަށް ލުއިފަސޭހަކޮށްދިނުމެވެ. އެގޮތުން ސަރުކާރުގެ އައިނު ފިހާރަ ދެން ހުޅުވާނީ ކުޅުދުއްފުށި ސިޓީ ގަ އެވެ.
