ޤަވާޢިދާއި ޚިލާފަށް ހުޅަނގު އައްސޭރީގައި ވަޒަންވެރިވެގެން އުޅޭ ޔަހޫދީންތައް އެތަނުގެ ދަނޑުބިންތަކަށް ގެއްލުންދީ 300 ވަރަކަށް ޒައިތޫނި ގަސް އިއްޔެ މުލުން ލުހެ ބިންދާލައިފިއެވެ.

މަސްދަރުތަކުން ބުނާ ގޮތުގައި ރާމަاللهގެ އިރުއުތުރުގެ އަލްމުޣައްޔިރު އަވަށަށް ވަދެ، ގެތަކާއި ދަނޑުތަކާއި ޢާންމުންނަށް ވެސް ހައްދުފަހަނަ އަޅާފައިވާ ޓެރަރިސްޓު ނަތަންޔާހޫގެ އައުވާނުން ވަނީ ޙަމަލާ ދީފައެވެ.

ފަލަސްޠީނުގެ ރަސްމީ ހިސާބުތަކުން ދައްކާ ގޮތުގައި މި އަހަރު ފެށިގެން މިވީ މުއްދަތުގައި ޔަހޫދީ ވަޒަންވެރީން ވަނީ 349 ފަހަރު މަތީން ފަލަސްޠީނު ރައްޔިތުންގެ ގެދޮރާއި ދަނޑުބިންތަކަށް ޙަމަލާ ދީފައެވެ.

ޔަހޫދީން މި ޢަމަލުތައް ހިންގަނީ ހަތިޔާރު އެޅި ޒައެނިސްޓު ސިފައިންގެ ވެސް އެހީތެރިކަމާއި އެކުގައެވެ.

_{އިސްރާއީލު ސިފައިންގެ އެހީތެރިކަމާއި އެކު ޔަހޫދީ ވަޒަންވެރީން ފަލަސްޠީނުގެ ރައްޔިތުންނާއި ދިމާލަށް ހިލަ އުކަނީ.}

ޔަހޫދީ އަސްކަރިއްޔާގެ މީހުންނާއި އެކު މި ނުބައި ނުލަފާ މީހުން ވަނީ ފަލަސްޠީނުގެ ބައެއް ހިސާބުތަކުން 1،245 ޒައިތޫނި ގަސް ބިންދާލައި، ވިހަ ވެސް އަޅާލާފައެވެ. އޭގެ ތެރޭގައި ހެބްރޫންގެ 750 ގަހާއި ރާމަاللهގެ 245 ގަހާއި ނަބްލޫސްގެ 250 ގަސް ހިމެނެއެވެ.

ޣައްޒާގެ ނަސްލު ނައްތާލުމަށް ހިންގި ޖަރީމާތަކަށް ފަހު ޔަހޫދީން ވަނީ ހުޅަނގު އައްސޭރިއަށް ދެމުންދާ ޙަމަލާތައް ވަރުގަދަ ކޮށްފައެވެ. އެ ޙަމަލާތަކުގައި ފަލަސްޠީނުގެ 1،112 އަށް ވުރެ ގިނަ މީހުން ޝަހީދުކޮށްލައި، ގާތްގަނޑަކަށް 11،500 މީހުން ޒަޚަމް ކޮށްލާފައި ވެއެވެ. އަދި 21،000 އަށް ވުރެ ގިނަ މީހުން ވަނީ ޔަހޫދީންގެ ހުރަގެ ތަކަށް ލައި ތަޅުލައި ބަންދު ކޮށްފައެވެ.