ޕާކިސްތާނުގެ ވެރިރަށް އިސްލާމްއާބާދުގައި ހުންނަ މިސްކިތެއްގައި ހުކުރު ނަމާދު ވަގުތު ދިން ވަރުގަދަ ބޮމުގެ ހަމަލާއެއްގައި މަދުވެގެން 31 މީހުން މަރުވެ، 169 އަށް ވުރެ ގިނަ މީހުން ޒަހަމްވެއްޖެ އެވެ.
އިސްލާމްއާބާދުގެ އޮފިޝަލުންނާއި ފުލުހުން މައުލޫމާތު ދޭ ގޮތުގައި، މި ނުރައްކާތެރި ހާދިސާ ހިނގާފައިވަނީ އެ ސިޓީގެ ތަރްލާއި ސަރަހައްދުގައި ހުންނަ މިސްކިތެއްގަ އެވެ. މި ހަމަލާއަކީ ޖާނުން ފިދާވެގެން ދިން ހަމަލާއެއް ކަމަށާއި، ހަމަލާދިން މީހާ އޭނާގެ ހަށިގަނޑުގައި ހަރުކޮށްފައިވާ ގޮވާތަކެތި ގޮއްވާލާފައިވަނީ މިސްކިތުގެ ދޮރުމަތީގައި ކަމަށް ފުލުހުން ހާމަކުރެ އެވެ. ބައެއް މީހުން ބުނި ގޮތުގައި، ބޮން ގޮއްވާލުމުގެ ކުރިން އެ ސަރަހައްދުން ބަޑީގެ އަޑުތަކެއްވެސް ވަނީ އިވިފަ އެވެ.
މި ހާދިސާގައި އަނިޔާވި މީހުންގެ އަދަދު ގިނަވުމާ ގުޅިގެން، އިސްލާމްއާބާދުގެ ހޮސްޕިޓަލްތަކުގައި ވަނީ ކުއްލި ހާލަތު އިއުލާންކޮށްފައެވެ. ސިއްހީ އިދާރާތަކުން ވަނީ އަނިޔާވި މީހުންނަށް ފަރުވާ ދިނުމަށްޓަކައި ލޭ ހަދިޔާކުރުމަށް އާންމުންގެ ކިބައިން އިލްތިމާސްކޮށްފަ އެވެ.
ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވަނީ މި ހަމަލާ ހަރުކަށި އިބާރާތުން ކުށްވެރިކުރައްވައި، ހާދިސާއާ ގުޅިގެން ހިތާމަ ފާޅުކުރައްވާފަ އެވެ. އަދި މި ލޭއޮހޮރުވުމުގެ ފަހަތުގައި ތިބި ބަޔަކު ވަގުތުން ދެނެގަނެ، މިކަން ފުރިހަމައަށް ތަހުގީގު ކުރުމަށް ކަމާބެހޭ ފަރާތްތަކަށް އެމަނިކުފާނު ވަނީ އަމުރުކުރައްވާފަ އެވެ. ޕާކިސްތާނުގެ ރައީސް އާސިފް އަލީ ޒަރުދާރީވެސް ވަނީ މި ހަމަލާ ކުށްވެރިކުރައްވައި، ކުށެއްނެތް އާންމުންނަށް އަމާޒުކޮށް ހަމަލާދިނުމަކީ އިންސާނިއްޔަތާ ހިލާފު ޖަރީމާއެއްގެ ގޮތުގައި ސިފަކުރައްވާފަ އެވެ.
މި ހަމަލާއާ ގުޅޭގޮތުން ޕާކިސްތާނުގެ ދިފާއީ މިނިސްޓަރު ހަވާޖާ އާސިފް ވަނީ ސީރިއަސް ތުހުމަތުތަކެއް ކުރައްވާފަ އެވެ. ސޯޝަލް މީޑިއާގައި ކުރެއްވި ޕޯސްޓެއްގައި އޭނާ ވިދާޅުވީ، ހަމަލާދިން މީހާއަކީ އަފްގާނިސްތާނަށް ދަތުރުކޮށްފައިވާ މީހެއްކަން ސާބިތުވާ ކަމަށާއި، މިއީ އިންޑިއާއާއި އަފްގާނިސްތާނު ގުޅިގެން ހިންގި އަމަލެއްކަން ހާމަވާ ގޮތަށް ވިދާޅުވެފަ އެވެ. އަދި މިސްކިތުގެ ސެކިއުރިޓީ ގާޑުން އެމީހާ ހުއްޓުވަން މަސައްކަތް ކުރުމުން، އޭނާ ފުރަތަމަ ބަޑިޖެހުމަށްފަހު އަމިއްލަ ހަށިގަނޑު ގޮއްވާލީ ކަމަށްވެސް އޭނާ ވިދާޅުވި އެވެ.
