ރާއްޖޭގެ ދަރަނި ދެއްކުމުގެ ގާބިލުކަން މިހާރުގެ ސަރުކާރުގައި އެބަހުރި ކަމަށާއި، ދަރަނި ދެއްކޭނެ ކަމުގެ ފުރިހަމަ ޔަގީންކަން އެބައޮތް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ދައުލަތުގެ މީޑިއާ އަށް މައުލޫމާތު ދެއްވަމުން މިނިސްޓަރު ޒަމީރު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު އިސްވެ ކުރެއްވި ހަރުދަނާ މަސައްކަތްޕުޅުގެ ސަބަބުން، ދައުލަތުގެ ސަވަރިން ޑިވެލޮޕްމަންޓް ފަންޑު (އެސްޑީއެފް) އަދި ޔޫޒަބަލް ރިޒާވްގައި މިހާރު ވެސް ދަރަނި ދެއްކުމުގެ ގާބިލުކަން އެބަހުރި ކަމަށެވެ.
މިކަމާ ގުޅޭ ތަފްސީލީ ހިސާބުތަކަށް އަލިއަޅުއްވާލައްވަމުން މިނިސްޓަރު ފާހަގަކުރެއްވި ގޮތުގައި، ރައީސް މުއިއްޒު ރިޔާސީ ބަޔާނުގައި ވެސް ބަޔާންކުރެއްވި ފަދައިން، އެސްޑީއެފްގައި މިހާރު 275 މިލިއަން ޑޮލަރު އެބަހުއްޓެވެ. އަދި ޔޫޒަބަލް ރިޒާވްގައި 600 މިލިއަން ޑޮލަރު ހުރިއިރު، ރާއްޖޭގެ ގްރޮސް ރިޒާވްގައި އެއް ބިލިއަނަށް ވުރެ ގިނަ ޑޮލަރު ހުރިކަން ޒަމީރު ފާހަގަކުރެއްވި އެވެ.
Advertisement
ރާއްޖޭގެ މާލީ ހާލަތު ރަނގަޅުވަމުންދާކަން ހާމަކުރައްވަމުން މިނިސްޓަރު ވިދާޅުވީ، ރާއްޖޭގެ ލިކުއިޑިޓީ ހާލަތަށް ބަލައި، ސުކޫކު ރީފައިނޭންސް ކުރަން ބޭނުންވާ 150 މިލިއަނެއްހާ ޑޮލަރުގެ ދަރަނި ނަގަންޖެހޭއިރު، ވަރަށް ކުޑަ އިންޓަރެސްޓެއްގައި އެ ފައިސާ ހޯދޭނެ ފަދަ އިގްތިސާދީ މާހައުލެއް މި ސަރުކާރުން ވަނީ ގާއިމުކޮށްފަ އެވެ.
މީގެ އިތުރުން، އިންޑިއާ ސަރުކާރުން ރާއްޖެއަށް ހަމަޖައްސައިދީފައިވާ 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީގެ ބޭނުން މިހާތަނަށް ސަރުކާރުން އެއްވެސް ކަމަކަށް ހިފާފައި ނުވާކަން މިނިސްޓަރު ހާމަކުރެއްވި އެވެ. އަދި މީގެ އިތުރުން ވެސް އިންޑިއާއިން ދީފައިވާ 400 މިލިއަން ޑޮލަރުގެ އިތުރު ކަރަންސީ ސްވޮޕް ފެސިލިޓީއެއް ވެސް ބޭނުންނުކޮށް އެބައޮތް ކަމަށް ވިދާޅުވެ، ރާއްޖޭގެ މާލީ ރިޒާވް ވަރުގަދަކަން މިނިސްޓަރު ޒަމީރު ވަނީ ކަށަވަރުކޮށްދެއްވާފަ އެވެ.
