މީހެއްގެ ފުރާނަ ސަލާމަތްކޮށްދިނުމަކީ ގިނަ ބައެއްގެ ފުރާނަ ސަލާމަތްކޮށްދިނުމާ އެއްފަދަ ކަމެއް ކަމަށް ހުކުރު ހުތުބާގައި ބުނެފި އެވެ.

މާތްﷲގެ އަޅުންތަކުންނަށް އެހީތެރިވުމާއި، ފައިސާއާއި މުދަލުން ހޭދަކުރުމާއި، ސަދަގާތްކުރުމަކީ، ދަރުމަހުރި ކަމެއް ކަން ފާހަގަކުރަމުން މިއަދުގެ ހުކުރު ހުތުބާގައި ބުނީ، މީހުންނާ ބައްދަލުވާ ހިނދު އެންމެ ކުޑަމިނުން އުފާވެރި މޫނަކައިގެން ބައްދަލުކޮށް، ހެޔޮ ބަހެއް ބުނުމަކީ ވެސް ކުރެވޭ ސަދަގާތެއް ކަމަށެވެ. ހުތުބާގައި ބުނީ، އެފަދަ ހެޔޮ އަމަލުތަކުގެ ސަބަބުން ލިބޭ ސަވާބާއި ދަރުމަ އެތަށް ގުނައެއް އިތުރުވެގެންވާ ކަމަށެވެ.

އެގޮތުން، މީހެއްގެ ފުރާނަ ސަލާމަތްކުރުމަށް ޓަކައި އަމިއްލަ ހަށިގަނޑުގައި ހުރި ލޭ ހަދިޔާކުރުން ފަދަ ކުޑަކުޑަ ހޭދައެއް ކުރުމުގެ ސަބަބުން، ނިއުމަތްތަކުން ފުރިގެންވާ ސުވަރުގެއަށް ވަނުމުގެ ނަސީބު ލިބޭކަމަށް ހުތުބާގައި ވަނީ ބުނެފަ އެވެ.

"މާތްﷲގެ އަޅުތަކުންނަށް ޖެހޭ ބޭނުންތައް ފުއްދައިދީ، އެއުރެންނަށް ޖެހޭ ބޮޑެތި ކަންކަމުގައި މިއަދު އެހީތެރިވުމަކީ، އާހިރަތް ދުވަހުން ތިޔަބައިމީހުން އުފުލަންޖެހޭ ބޮޑެތި މުސީބާތްތަކުން ދިންނަވާނެ ކަމެއް، ކޮންމެ މުސްލިމަކު ވެސް މިއަދު އަވަސްވެގަންނަންވީ އެ ދުވަހުގެ ބިރުވެރިކަމާއި، އަޒާބުން މިންޖުވާނެ އަމަލެއް ކުރެވޭ، އެއީ އެކަން ކުރެވެން އޮތީ މިއަދުކަމަށް ވާތީ،" --- ހުތުބާގައި ބުންޏެވެ.

ހުތުބާގައި ބުނީ، ލޭ އަޅަން ބޭނުންވާ ހާލަތްތަކުގައި، ބަލި މީހަކަށް އަޅަން ބޭނުންވާ ލޭ ހަދިޔާކޮށްދިނުމަކީ، އޭނާގެ ފުރާނަ ސަލާމަތްކޮށްދިނުން ފަދަ ކަމެއް ކަން ފާހަގަކުރަމުން ހުތުބާގައި ބުނީ، ހައްގަކާ ނުލައި އެންމެ މީހަކު މެރުމަކީ ދުނިޔޭގައިވާހައި ބަޔަކު މެރުމާ އެއްފަދަ ނުބައިކަމެއް ކަމަށެވެ. ހަމައެފަދައިން އެންމެ އިންސާނެއްގެ ފުރާނަ ސަލާމަތްކޮށްދިނުމަކީ، އެ އެންމެން ނުމަރައި ދިރިހުންނަން ދޫކޮށްލުމާ އެއްފަދަ ވެގެންވާ ހެޔޮ އަމަލެއްކަމަށް ހުތުބާގައި ބުންޏެވެ.

ލޭ ހަދިޔާކުރުމަކީ ދެމިގެންވާ ސަދަގާތެއްކަމުގައި ޖުމްހޫރު އިލްމުވެރިން ދެކިވަޑައިގަންނަވާއިރު އެއީ، އިންސާނާ މަރުވުމަށް ފަހުގައި ވެސް އެ ސަދަގާތެއްގެ ހެޔޮ އަސަރު ދެމިހުންނަހައި ހިނދަކު، ސަދަގާތްކުރި މީހާއަށް ސަވާބު ލިބިލިބި ހުންނާނެ ކަމަށް ހުތުބާގައި ވަނީ ބުނެފަ އެވެ.

ލޭ ހަދިޔާކުރުމުގެ އިތުރުން ވެސް މީހުންގެ ފުރާނަ ސަލާމަތްކުރުމަށް ކުރެވިދާނެ ކިތަންމެ ކަމެއް ހުންނާނެކަން ފާހަގަކުރަމުން ހުތުބާގައި ބުނީ އެފަދަ ކަންކަމުގެ ތެރޭގައި ކާންބޯން ނުލިބޭ މީހުންނަށް ކާނެ އެތިކޮޅެއް ދިނުމާއި، ތަނަވަސްކަން ނެތުމުގެ ސަބަބުން ބޭސް ފަރުވާ ނުކުރެވިގެން އުޅޭ މީހުންނަށް އެހީތެރިވެ ދިނުމާއި، އެއްގަމާއި ކަނޑާއި، ވައިގެ ދަތުރުތަކުގައި ކުރިމަތިވާ ހާދިސާތަކުގައި އަނިޔާވާ މީހުން ސަލާމަތްކުރުމަށް މަސައްކަތްކުރުމާއި، އެ މީހުންނަށް އަވަސް ފަރުވާ ދިނުން އަދި ހޮސްޕިޓަލާ ހަމައަށް އެ މީހުން ގެނގޮސްދިނުމަކީ މީގެ ތެރޭގައި ހިމެނޭ ކަންކަން ކަމުގަ އެވެ.

ހުތުބާގައި އިތުރަށް ބުނީ، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަކީ ކޮންމެ މުސްލިމަކު ވެސް އޭނާގެ ކެރިފޯރުންތެރިކަން ހުރި މިންވަރަކުން ކުރަންޖެހޭނެ ކަމެއް ކަމަށެވެ.