ށ. ފުނަދޫގައި ގާއިމުކުރާ އެއާ ސްޓޭޝަން ނިންމައި މި އަހަރުގެ ތެރޭގައި ބޭނުންކުރަން ފަށާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މި މޭރުމުން ވިދާޅުވީ ރައްޔިތުންގެ މަޖިލީހުގެ 2026 ވަނަ އަހަރުގެ ފުރުތަމަ ދައުރުގެ ފުރުތަމަ ޖަލްސާގައި ރިޔާސީ ބަޔާން އިއްވަވަމުންނެވެ. އެ މަނިކުފާނު ވިދާޅުވީ، އެމްއެންޑީއެފްގެ އެއާ ކޯ ތަރައްގީކުރުމުގެ މަސައްކަތް މިދިޔަ 2025 ވަނަ އަހަރު ކުރެވިފައިވާ ކަމަށެވެ. އެ ގޮތުން އެމްއެންޑީއެފްގެ ފުރަތަމަ އެއާ ސްޓޭޝަން އައްޑޫ ސިޓީގައި ތަރައްގީކޮށް ނިންމައި ބޭނުންކުރަން މިހާރު ފަށާފައިވާ ކަމަށް ރައީސް ވަނީ ވިދާޅުވެފަ އެވެ.
މީގެ އިތުރުން އުތުރުގައި އެއާ ސްޓޭޝަނެއް ގާއިމުކުރުމަށްޓަކައި ށ. ފުނަދޫގައި ތަރައްގީކުރަމުންދާ އެއާ ސްޓޭޝަނުގެ މަސައްކަތް ނިންމައި މި އަހަރު ބޭނުން ކުރަން ފަށާނެކަމުގެ ޔަގީންކަން ރައީސް ދެއްވި އެވެ. ރައީސް ވިދާޅުވީ، ދިވެހި ގައުމުގެ ޝަރަފުވެރި ސިޔާދަތާއި އަމިއްލަ މިނިވަންކަމާއި އިސްތިގުލާލު ދަމަހައްޓައި، ދިފާއީ ރައްކާތެރިކަން ކަށަވަރުކުރުމުގައި ރާއްޖެއިން މުހިއްމު ކުރިއެރުންތަކެއް ހޯދާފައިވާ ކަމަށެވެ.
"ގައުމީ ދިފާއީ ބާރުގެ ހުރިހާ ދާއިރާއެއްގެ ފެންވަރު މަތިކުރުމަށް ވޭތުވެ ދިޔަ އަހަރު ގިނަގުނަ މަސައްކަތްތަކެއް ވަނީ ކުރެވިފައި، އެ ގޮތުން، ކޯސްޓްގާޑްގެ ހިދުމަތް ދެ ގުނަކުރުމުގެ މަސައްކަތުގެ ތެރެއިން، ތުރުކީ ވިލާތުގެ ސަރުކާރުން ދެއްވި ހިލޭ އެހީއެއްގެ ގޮތުގައި ސިފައިންގެ ހިދުމަތަށް މިހާތަނަށް ތައާރަފު ކުރެވުނު އެންމެ ބޮޑު އަސްކަރީ މަނަވަރު މި ދިޔަ އަހަރު ހިދުމަތަށް ނެރުނިން. އަދި ސިފައިން ހިންގާ މެރިޓައިމް ސެކިއުރިޓީ އޮޕަރޭޝަންތަކާއި، ސާޗް އެންޑް ރެސްކިއު އޮޕަރޭޝަންތަކަށް ބޭނުންވާ އިންޓަސެޕްޓާ ކްރާފްޓް ހޯދުމުގެ މަސައްކަތް ފަށައި އޭގެތެރެއިން ތިން އުޅަނދު މިހާރުވާނީ ހިދުމަތަށް ނެރެފައި،" --- ރައީސް ވިދާޅުވި އެވެ.
ރައީސް ވިދާޅުވީ މި އަހަރުގެ ތެރޭގައި އިތުރު 17 އުޅަނދެއް ހިދުމަތަށް ނެރެވޭނެ ކަމަަށެވެ. އަދި، ދެ ހާބާ ކްރާފްޓް ޕެޓްރޯލް ވެސަލް ހޯދުމަށް ޖަޕާން ސަރުކާރުން ފައިސާގެ އެހީ ދިނުމަށް ވަނީ ނިންމާފައިވާކަމަށާއި، އެއާއެކު، ދިވެހިރާއްޖޭގެ ސަރަހައްދާއި ހާއްސަ އިގްތިސާދީ ސަރަހައްދު ބެލެހެއްޓުމަށް އޮސްޓްރޭލިއާ ސަރުކާރުގެ އެހީގައި ހޯދާ މަނަވަރު މި އަހަރުގެ ތެރޭގައި ހިދުމަތަށް ނެރެވިގެންދާނެ ކަމަށް އެ މަނިކުފާނު ވިދާޅުވި އެވެ.
މީގެ އިތުރުން، އެމްއެންޑީއެފްގެ މެރިންކޯއަށް އެންމެ ޒަމާނީ އާމަޑް ވެހިކަލް މިދިޔަ އަހަރު ހޯދާފައިވާނެކަމަށާއި، މި އަހަރުގެ ތެރޭގައި މެރިން ކޯގެ ގާބިލުކަން އިތުރުކުރުމަށް ބޭނުންވާ އާލާތްތައް ހޯދުމާއި، ވަސީލަތްތައް ގާއިމުކުރުމުގެ މަސައްކަތް ކުރެވިގެންދާނެކަމަށް ވެސް ރައީސް ވަނީ ވިދާޅުވެފަ އެވެ.
ރާއްޖޭގެ ދިފާއީ ކަންކަން ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަކަން ފާހަގަކޮށްލެވެ އެވެ.
