ފޯޅަވަހީގެ މައްސަލައިގައި އެމްޑީޕީ ސަރުކާރުން މޮރިޝަސް އަށް ވިއްކާލި ކަނޑުގެ ސަރަހައްދަކީ އަދިވެސް ރާއްޖޭގެ ކަނޑުގެ ސަރަހައްދު ކަމަށް ބެލުމަށް ރައީސް ޑރ. މުހައްމަދު މުއިއްޒު ނިންމަވާފައިވާތީ އެ ސަރަހައްދު ބަލަހައްޓާނެ ކަމަށް ޑިފެންސް މިނިސްޓްރީން މިއަދު ބުނެފި އެވެ.
ރިޔާސީ ބަޔާން އިއްވަމުން ރައީސް ވަނީ ރާއްޖޭގެ ކަނޑުގެ ސަރަހައްދަކީ ގާނޫނުގައި މިހާރުވެސް ކަނޑައަޅާފައިވާ، ކުރީގެ ސަރުކާރުން ދޫކޮށްލި ކަމަށް ބުނާ ކަނޑުގެ ސަރަހައްދުވެސް ހިމެނޭ ގޮތަށް އޮތް ސަރަހައްދު ކަމަށް ވިދާޅުވެފަ އެވެ. އަދި އެ މައްސަލައިގައި ރާއްޖޭގެ ސްޓޭންޑް ބަދަލުކޮށް ކުރީގެ ރައީސް އިބްރާހިމް މުހައްމަދު ސޯލިހު މޮރިޝަސް އަށް ފޮނުވި ސިޓީ އަނބުރާ ގެންނަވާކަން އަންގައި އެގައުމުގެ ބޮޑުވަޒީރަށް ރައީސް މުއިއްޒު ވަނީ ސިޓީފުޅެއްވެސް ލިޔުއްވާފަ އެވެ.
ޑިފެންސް މިނިސްޓްރީން މިއަދު ނެރުނު ބަޔާނެއްގައި ބުނީ ދިވެހިރާއްޖޭގެ ކަނޑުގެ ސަރަހައްދަށް އެއްވެސް ބަދަލެއް އައިސްފައިވާ ކަމަށް ދައުލަތުން ބަލައިނުގަންނަކަމަށް ރައީސް އިއުލާން ކުރެއްވުމާ ގުޅިގެން، ރާއްޖޭގެ އެސްއީޒެޑް ބެލެހެއްޓުމުގެ މަސައްކަތް ވަރުގަދަކޮށްފައިވާ ކަމަށެވެ.
Advertisement
މިނިސްޓްރީން ހާމަކުރި ގޮތުގައި، ގާނޫނުއަސާސީއާއި ސިފައިންގެ ގާނޫނުން މަތިކޮށްފައިވާ ޒިންމާގެ ދަށުން، ރާއްޖޭގެ މިނިވަންކަމާއި ސިޔާދަތު ދިފާއުކޮށް، 200 ނޯޓިކަލް މޭލުގެ އެސްއީޒެޑް ސަރަހައްދު ބެލެހެއްޓުމުގެ މަސްއޫލިއްޔަތު އަސްކަރިއްޔާއިން ފުރިހަމައަށް އަދާކުރާނެ އެވެ. އަދި އުތުރުގެ ބައެއް ސަރަހައްދުތައް ފިޔަވައި، އެހެން އެއްވެސް ގައުމަކާއެކު ކަނޑުގެ ސަރަހައްދުން ބައެއް ގެއްލިދާނެ ފަދަ އެއްބަސްވުމެއް ސަރުކާރުން އެކުލަވާލާފައި ނުވާކަން ވެސް އެ މިނިސްޓްރީން ވަނީ ފާހަގަކޮށްފަ އެވެ.
މި މަސައްކަތުގެ ދަށުން، ރާއްޖޭގެ ދެކުނުގެ ކަނޑުގެ ސަރަހައްދު ބެލެހެއްޓުމަށްޓަކައި އެމްއެންޑީއެފް ކޯސްޓްގާޑް އުޅަނދުތަކާއި އެއާ ކޯގެ ޑްރޯންތައް ބޭނުންކޮށްގެން ހާއްސަ ސަވައިލަންސް އޮޕަރޭޝަނެއް މިހާރު ވަނީ ފަށާފަ އެވެ. ފާއިތުވި ދެ އަހަރުގެ ތެރޭގައި ސަރުކާރުން ވަނީ ކަނޑާއި ވައިގެ މަގުން ސަރަހައްދު ބެލެހެއްޓޭނެ ޒަމާނީ ވަސީލަތްތައް ގާއިމުކޮށް، އަސްކަރިއްޔާގެ ގާބިލުކަން އިތުރުކޮށްފަ އެވެ.
އެ ބަޔާނުގައި ދިވެހި އަސްކަރިއްޔާއިން ވަނީ ރާއްޖޭގެ ކަނޑުގެ ސަރަހައްދުތަކުގައި އިގުތިސާދީ އަދި އިޖުތިމާއީ މަންފާ ހޯދުމަށް އަމާން ވެއްޓެއް ގާއިމުކޮށްދީ، ގައުމީ މަސްލަހަތު ހިމާޔަތްކުރުމުގައި ސާބިތުކަމާއެކު ދެމިތިބޭނެކަމުގެ ޔަގީންކަން ރައްޔިތުންނަށް ދީފައެވެ.
