ޗައިނާގައި މިހާރު ފާހަގަކުރަމުންދާ "ލޫނާ ނިއު އިޔާ" ނުވަތަ ޗައިނާގެ އައު އަހަރުގެ ހަރަކާތްތަކުގެ ތެރެއިން، އެންމެން ހައިރާންކުރުވި އައު ރަމްޒެއްގެ ގޮތުގައި ހެރީ ޕޮޓާގެ ފިލްމުތަކުން ފެނިގެންދާ ޑްރާކޯ މަލްފޯއީ މަގުބޫލުވެއްޖެ އެވެ.
ހެރީ ޕޮޓާ ސިލްސިލާގައި ޑްރާކޯ މަލްފޯއީގެ ރޯލުން ފެނިގެންދާ އެކްޓަރު ޓޮމް ފެލްޓަންގެ ސޫރަ، މިހާރު ޗައިނާގެ ގިނަ ގޭބިސީތަކުން ފެންނަމުންދާއިރު، އޮންލައިން ވިޔަފާރިކުރާ ސައިޓުތަކުގައި އޭނާގެ މޫނު ހިމަނައިގެން ތައްޔާރުކޮށްފައިވާ އައު އަހަރުގެ ޒީނަތްތެރިކުރުމުގެ ސާމާނުތައް ދަނީ ވަރަށް ބޮޑަށް ވިކެމުންނެވެ.
މަލްފޯއީއަށް މިފަދަ ބޮޑު މަގުބޫލުކަމެއް ކުއްލިއަކަށް ލިބުނު ސަބަބަކީ، އޭނާގެ ނަން ކަމަށްވާ "މަލްފޯއީ" ޗައިނާ ބަހަށް ތަރުޖަމާކުރުމުން ކިޔާ ގޮތް ކަމަށްވާ "މާ-އެރްފޫ"ކަމަށް ވާތީއެވެ. މި ނަމުގައި ހިމެނޭ ބަސްތަކުން "އަސް" އަދި "ބާއްޖަވެރިކަން" ނުވަތަ "ނަސީބު" މި މާނަ ދޭހަވެއެވެ. އެހެންކަމުން މިއީ ވަރަށް ބޮޑު ނަސީބެއް ގެނެސްދޭނެ ކަމެއްގެ ގޮތުގައި އެ ގައުމުގެ މީހުން ގަބޫލުކުރެ އެވެ.
މިކަމާ ގުޅިގެން ޗައިނާގެ މަޝްހޫރު އީ-ކޮމާސް ސައިޓެއް ކަމަށްވާ "ޓާއޯބާއޯ"އިން މަލްފޯއީގެ ފޮޓޯ ހިމެނޭ ސްޓިކާތަކާއި މެގްނެޓް ފަދަ ތަކެތި ވިއްކަން ފަށާފައިވެއެވެ.
މަލްފޯއީގެ މި މަގުބޫލުކަން އެކްޓަރު ޓޮމް ފެލްޓަންގެ ސަމާލުކަމަށް ވެސް ވަނީ އައިސްފައެވެ. އޭނާ ވަނީ ޗައިނާގެ އައު އަހަރުގެ ރަމްޒަކަށް އޭނާގެ ކެރެކްޓަރު ވެގެންދިޔަ ހަބަރު އިންސްޓަގްރާމްގައި ހިއްސާކޮށްފަ އެވެ. މިކަމުގެ ސަބަބުން ޗައިނާގެ ސޯޝަލް މީޑިއާގައި ފޭނުންގެ ފޯރި އިތުރަށް ގަދަވެފައިވެ އެވެ.
ހެރީ ޕޮޓާ ސިލްސިލާއަށް ޗައިނާގައި އޮތް ބޮޑު ތަރުހީބުގެ ސަބަބުން، "ވޯނާ ބްރަދާސް ޑިސްކަވަރީ" އިން ވަނީ 2027 ވަނަ އަހަރު ޝަންހާއީގައި ހެރީ ޕޮޓާގެ އެންމެ ބޮޑު ސްޓޫޑިއޯ ޓުއާ ހުޅުވުމަށް ވެސް ނިންމާފަ އެވެ. އެ ގައުމުގައި މި ސިލްސިލާގެ ފުރަތަމަ ފިލްމު 2020 ވަނަ އަހަރު އަލުން އެޅުވުމުން ވެސް އެންމެ ތިން ދުވަހުގެ ތެރޭގައި 90 މިލިއަން ޔުއާންގެ އާމްދަނީއެއް ވަނީ ލިބިފަ އެވެ.
