ރާއްޖޭގެ 29 ސްކޫލެއްގައި އިތުރު އިމާރާތައް އެޅުމުގެ މަސައްކަތް ތިން ކުންފުންޏަކާއި މިހާރު ހަވާލު ކޮށްފައިވާ ކަމަށް އެޑިއުކޭޝަން މިނިސްޓްރީން ބުނެފި އެވެ.

އެޑިއުކޭޝަން މިނިސްޓްރީން ބުނީ ރާއްޖޭގެ 29 ސްކޫލެއްގައި އަލަށް ހަދާ އިމާރަތްތަކުގެ މަސައްކަތް ހަވާލު ކޮށްފައިވާ ތިން ކުންފުންޏަކީ އެމްޓީސީސީ އާއި އެފްޑީސީ އަދި އާރުޑީސީ ކަމަށެވެ.

އެކުންފުނިތަކާއި އެކު އެއްބަސްވުމުގައި އެޑިއުކޭޝަން މިނިސްޓްރީން ސޮއި ކުރީ ސްޓޭޓް މިނިސްޓަރު ޑރ. އަބްދުލް ލަތީފް މުހައްމަދު އެވެ. އާރްޑީސީގެ ފަރާތުން ސޮއިކުރެއްވީ ޗީފް ފައިނޭންޝަލް އޮފިސާ ހަސަން ރިފައީ ބުޝްރީ އެވެ. އަދި އެފްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ހަމްދާން ޝަކީލު އެވެ. އޭގެ އިތުރުން އެމްޓީސީސީގެ ފަރާތުން ސޮއިކުރެއްވީ ޑެޕިއުޓީ މެނޭޖިން ޑިރެކްޓަރު މުހައްމަދު ޖަމްޝީދު އެވެ.

އެޑިއުކޭޝަން މިނިސްޓްރީން ކުރިއަށް ގެންދާ 29 ޕްރޮޖެކްޓުތަކާ އެކު ރާއްޖޭގައި 115 ކުލާސް ރުމާއި 19 މަލްޓި ޕާޕޯސް ހޯލްގެ އިތުރުން 219 އެޑިއުކޭޝަން ފެސިލިޓީ ގާއިމު ކުރެވޭނެ ކަމަށް މިނިސްޓްރީން ބުންޏެވެ.

އެޑިއުކޭޝަން މިނިސްޓްރީން މަސައްކަތް ނިންމުމަށް ހަވާލު ކޮށްފައިވާ 29 ޕްރޮޖެކްޓްގެ ތެރެއިން، އެފްޑީސީން ހަވާލުވެފައި ވަނީ 18 ޕްރޮޖެކްޓަކާ އެވެ. ހަ ޕްރޮޖެކްޓާ ހަވާލުވެފައި ވަނީ އާރުޑީސީ އެވެ. އަދި ހަތަރު ޕްރޮޖެކްޓާއި ހަވާލުވީ އެމްޓީސީސީ އެވެ.

އެފްޑީސީ ހަވާލުވެފައިވާ ޕްރޮޖެކްޓުތައް:

ކޮނޑޭ ސްކޫލް، ފިއްލަދޫ ސްކޫލް، މުރައިދޫ ސްކޫލް، ރަސްމާދޫ ސްކޫލް، ކިނޮޅަހު ސްކޫލް

ގއ. މާމެންދޫ ސްކޫލް، ޝަހީދު އަލިތަކުރުފާނު ސްކޫލް، ވަށަފަރު ސްކޫލް، މަޑުއްވަރީ ސްކޫލް

ވާދޫ ސްކޫލް، އަންގޮޅިތީމު ސްކޫލް، ރިންބޫދޫ ސްކޫލް، ހުޅުދެލި ސްކޫލް ދާންދޫ ސްކޫލް

ގެމަނަފުށި ސްކޫލް، ނަޑެއްލާ ސްކޫލް، މަޑަވެލި ސްކޫލް، ސުލްތާން މުހައްމަދު ސްކޫލް، ރަތަފަންދޫ ސްކޫލް

އާރުޑީސީ ހަވާލުވެފައިވާ ޕްރޮޖެކްޓުތައް:

އުލިގަމު ސްކޫލް، އިހަވަންދޫ ސްކޫލް، ހުޅުދުއްފާރު ސްކޫލް،

ރ. އަތޮޅު ތައުލީމް މަރުކަޒު، ގާފަރު ސްކޫލް، ގުރައިދޫ ސްކޫލް

އެމްޓީސީސީ ހަވާލު ވެފައިވާ ޕްރޮޖެކްޓުތަކަކީ:

އިންނަމާދޫ ސްކޫލް، ފިޔޯރީ ސްކޫލް، ށ. ފޭދޫ ސްކޫލް، ފ. ދަރަނބޫދޫ ސްކޫލް

މި 29 ސްކޫލެއްގައި އިތުރު އިމާރާތައް އެޅުމުގެ މަސައްކަތުގެ ތެރެއިން އެކި ސްކޫލްތަކުގައި ނިންމުމަށް ހަމަ ޖެހިފައި ވަނީ އެކި މަސައްކަތްތަކެވެ. އެގޮތުން ބައެއް ސްކޫލްތަކުގައި:

1. މަލްޓި ޕާޕޯސް ހޯލް
2. އާ ކުލާސް ރޫމްތައް
3. ސްޓާފް ރޫމް
4. ލައިބުރޭރީ
5. ކޮމްޕިއުޓާ ލެބް
6. ފާހަނާ
7. ސެން ކުލާސް ރޫމް
8. އިމާރާތައް ގެނެވޭ ބަދަލުތައް