ހަޔާ އެޑުކޭޝަނުން މިނިސްޓްރީން "ކުރި ޕޯޓަލް" އިފްތިތާހު ކޮށްފި އެވެ.

މިނިސްޓްރީ އޮފް ހަޔާ އެޑުކޭޝަނުން "ކުރި ޕޯޓަލް "ރަސްމީކޮށް އިފްތިތާހު ކުރީ އިއްޔެ ޕީއެސްއެމްގައި ބޭއްވި ރަސްމީޔާތެއްގައި އެވެ. އެ ރަސްމިއްޔާތު ޝަރަފްވެރި ކޮށްދެއްވައި، ޕޯޓަލް އިފްތިތާހު ކޮށްދެއްވީ ހަޔާ އެޑިއުކޭޝަން މިނިސްޓަރު އަލީ ހައިދަރު އަހްމަދު އެވ.ެ

މިކަމާއި ބެހޭ ގޮތުން މިނިސްޓްރީން އާއްމު ކުރި ނޫސް ބަޔާނުގައި ބުނެފައި ވަނީ "ކުރި ޕޯޓަލް" ގެ މައިގަނޑު މަގުސަދަކީ މަތީ ތައުލީމު ހޯދުމަށް ކުރިމަތިވާ ދަތިތަކަށް ހަލެއް ހޯދައި ދިނުން ކަމަށެވެ.

"ކުރި ޕޯޓަލް" ނިޒާމާއި އެކު މަތީ ތައުލީމު ހޯދާ ދަރިވަރުންގެ ކަންބޮޑުވުންތަކަށް ލުޔެއް ލިބޭނެ ކަމަށް އެމިނިސްޓްރީން ބުންޏެވެ. އެގޮތުން ސްކޮލާޝިޕް އަދި ލޯނުގެ ހިދުމަތްތައް ސްޓްރީމްލައިންކޮށް، އަވަހަށް ސްކީމްތައް މެނޭޖުކުރުމާއި ފައިސާ ދޫކުރުމުގެ ކަންކަން އެނިޒާމާއި އެކު ހަރުދަނާ ވާނެ ކަމަށް މިނިސްޓްރީން ބުނެފައިވެ އެވެ. އަދި ސްކޮލާޝިޕްތަކާއި ފަންޑިން ސްކީމްތަކަށް އެޕްލައިކޮށް, ޝަރުތު ހަމަވޭތޯ ބެލުމަށް އެސެސްމަންޓްތައް ހެދުން ވެސް "ކުރި ޕޯޓަލް" އާއެކު އަވަސް ވާނެ ކަމަށް އެމިނިސްޓްރީ މައުލޫމާތު ދީފައިވެ އެވެ.

އޭގެ އިތުރުން، ހަޔާ އެޑިއުކޭޝަން މިނިސްޓްރީގެ މުވާސަލާތީ ހިދުމަތުގެ ފެންވަރު ރަނގަޅު ކުރުމަށް ޓަކައި އެޕޯޓަލް މެދުވެރިކޮށް ކުރެވޭ ސުވާލުތަކަށް ވަގުތުން ޖަވާބު ދެވޭނެ ގޮތް މިސިސްޓަމްގެ ތެެރެއިން ތައާރަފު ކޮށްފައި ވާނެ ކަމަށް މިނިސްޓްރީން ބުނެފައިވެ އެވެ.

މިބަދަލަކީ މުޅި ދައުލަތުގެ ހުރިހާ މުއައްސަސާތައް ގުޅިގެން، ޑިޖިޓަލް ދާއިރާއިން ރާއްޖެ އިންގިލާބީ ބަދަލުތަކަކާ ދިމާއަށް ގެންދިއުމަށް ރައީސުލްޖުމްހޫރިއްޔާގެ ތަސައްވުރުފުޅާއި އެއްގޮތަށް، ދައުލަތުގެ ބަޖެޓުގައި ތައުލީމަށް އެންމެ މަތީ ދަރަޖައިގެ އިސްކަންދިނުމުގެ ސިޔާސަތުގެ ދަށުން ކުރެވުނު މަސައްކަތެއްކަން މިނިސްޓްރީން ފާހަގަ ކޮށްފައިވެ އެވެ.