ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސްޕެޝަލް އެންވޯއީގެ މަގާމުގައި ހުންނެވި ކުރީގެ ރައީސް ޑރ. މުހައްމަދު ވަހީދު ހަސަން މަނިކު މިއަދު އެ މަގާމުން އިސްތިއުފާ ދެއްވައިފި އެވެ.
ރައީސް އޮފީހުން މައުލޫމާތު ދީފައިވާ ގޮތުގައި، ޑރ. ވަހީދުގެ އިސްތިއުފާގެ ސިޓީ މިއަދު ހެނދުނުގެ ވަގުތެއްގައި ވަނީ ރައީސުލްޖުމްހޫރިއްޔާއަށް ފޮނުއްވާފަ އެވެ.
ޑރ. ވަހީދު މަގާމުން އިސްތިއުފާ ދެއްވި ސީދާ ސަބަބެއް ރަސްމީކޮށް ހާމަކޮށްފައި ނުވި ނަމަވެސް، ކުޑަކުދިންނަށް ޖިންސީ ގޯނާކުރުމާއި ޓްރެފިކިންގެ ބޮޑެތި ކުށްތަކެއް ސާބިތުވެ ޖަލުގައި އޮއްވާ މަރުވި ޖެފްރީ އެޕްސްޓެއިންއާ އެމަނިކުފާނާ ދެމެދު އޮތް ގުޅުންތަކެއްގެ ވާހަކަ ވަނީ ފެންމަތިވެފަ އެވެ. މިދިޔަ ހުކުރު ދުވަހު އެމެރިކާގެ ކަމާބެހޭ އިދާރާތަކުން އާންމުކުރި ލިޔެކިޔުންތަކާއި ސޯޝަލް މީޑިއާގައި ލީކުވެފައިވާ އީމެއިލްތަކުން އެނގޭ ގޮތުގައި، 2012 އިން 2015 އަށް ޑރ. ވަހީދާއި އެޕްސްޓެއިންއާ ދެމެދު މުއާމަލާތްތަކެއް ހިނގާފައިވެ އެވެ.
ލީކުވެފައިވާ އީމެއިލްތަކުގެ ތެރޭގައި، 2013 ވަނަ އަހަރުގެ ރިޔާސީ އިންތިހާބަށް އިންޑިއާއިން ނުފޫޒު ފޯރުވާ ކަމަށް ބުނެ ޑރ. ވަހީދު އެޕްސްޓެއިންއަށް ފޮނުއްވި މެއިލްތައް ހިމެނެ އެވެ. އެގޮތުން އެއް މެއިލްއެއްގައި ޑރ. ވަހީދު ވިދާޅުވެފައި ވަނީ، "އިންތިހާބު މިވީ ކުރިން ލަފާކުރި ވަރަށް ވުރެ މާ އުނދަގޫ ކަމަކަށް. އިންޑިއާއިން ދަނީ އިންތިހާބަށް ނުފޫޒު ފޯރުވަމުން، އަދި ނަޝީދު ފުރަތަމަ ބުރު ވަގަށް ނަގަން އެ ގައުމުން ވަނީ އެހީވެފައި،" ކަމަށެވެ.
މީގެ އިތުރުން، ކުރީގެ ރައީސް މައުމޫން އަބްދުލްގައްޔޫމަށް އިންތިހާބުގައި "ރަނގަޅު ފިލާވަޅެއް" ދޭނެ ކަމަށާއި، އެމަނިކުފާނު ޖެހޭނީ ރިޓަޔާ ކުރައްވައިގެން ދުރުގައި ހުންނަވަން ކަމަށްވެސް އެޕްސްޓެއިންއަށް ފޮނުއްވި މެއިލްތަކުގައި ޑރ. ވަހީދު ވިދާޅުވެފައިވެ އެވެ. އަދި 2018 ވަނަ އަހަރުގެ އިންތިހާބާ ގުޅޭގޮތުންނާއި، ކުރީގެ ރައީސް މުހައްމަދު ނަޝީދުގެ ޝަރީއަތާ ގުޅޭގޮތުންވެސް އެކި ވާހަކަތައް އެ މެއިލްތަކުގައި ހިމެނެ އެވެ.
ފެންމަތިވެފައިވާ ލިޔެކިޔުންތަކުން އިތުރަށް ހާމަވާ ގޮތުގައި، ރާއްޖޭގެ ރަށެއް ޕްރައިވެޓް އައިލެންޑެއްގެ ގޮތުގައި ތަރައްގީ ކުރުމުގެ މަސައްކަތް އެޕްސްޓެއިންއާ ގުޅިގެން ކުރިއަށް ގެންދިއުމަށް ޑރ. ވަހީދު މަސައްކަތް ކުރެއްވި އެވެ. އަދި އެކަމާ ގުޅޭ ފީޒިބިލިޓީ ރިޕޯޓެއް ހަދައި އެޕްސްޓެއިންއާ ހިއްސާކޮށްފައިވާކަން ވެސް އެ މެއިލްތަކުން އެނގެ އެވެ.
ޖެފްރީ އެޕްސްޓެއިންއަކީ 2008 ވަނަ އަހަރުވެސް ޖިންސީ ކުށުގެ ތުހުމަތުގައި ޖަލަށްލާފައިވާ މީހަކަށްވާއިރު، ޑރ. ވަހީދު އޭނާއާ ގުޅުން ބާއްވާފައިވަނީ އެ ހާދިސާގެ ފަހުންކަން ފާހަގަކުރެވެ އެވެ.
މި މައްސަލައާ ގުޅިގެން ޑރ. ވަހީދުގެ ފަރާތްޕުޅުން އަދި ވަކި އެއްޗެއް ހާމަކުރައްވާފައެއް ނުވެ އެވެ.
