ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ޑިރެކްޓާ ޖެނެރަލްގެ މަގާމަށް ކުރިމަތިލުމުގެ ފުރުސަތު ސިވިލް ސާވިސް ކޮމިޝަނުން މިއަދު ހުޅުވާލައިފި އެވެ.
ޑިރެކްޓާ ޖެނެރަލްގެ މަގާމަކީ އެ އިދާރާގެ އިސްވެރިޔާގެ މަގާމެވެ. އެ މަގާމު ހުސްވީ ކުރިން އެމަގާމުގައި ހުންނެވި މައިމޫނާ އަބޫބަކުރު ރިޓަޔާކުރެއްވުމާ ގުޅިގެންނެވެ. މައިމޫނާ ވަނީ އެމަގާމުގައި ނުވަ އަހަރު ހިދުމަތްކޮށްދެއްވާފަ އެވެ.
ސިވިލް ސާވިސް ކޮމިޝަނުގެ އިއުލާނުގައިވާ ގޮތުން އެ މަގާމަށް ހޮވޭ ފަރާތަކަށް މުސާރަ އާއި އެލަވަންސްތަކާއެކު މަހަކު ޖުމްލަ 41,876 ރުފިޔާ ލިބޭނެ އެވެ. މީގެ ތެރޭގައި ހިމެނެނީ އަސާސީ މުސާރައިގެ ގޮތުގައި 21,884 ރުފިޔާ އާއި، އެލަވަންސްގެ ގޮތުގައި 12,534 ރުފިޔާގެ އިތުރުން ހާޒިރީ އެލަވަންސްގެ ގޮތުގައި ލިބޭ 339 ރުފިޔާ އެވެ.
އެ މަގާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި، ގުޅުންހުރި ދާއިރާއަކުން ޕީއެޗްޑީ/ހަޔަ ޕްރޮފެޝަނަލް ޑިޕްލޮމާގެ ސަނަދު ހާސިލްކޮށް، ހަތަރު އަހަރުގެ ތަޖުރިބާ ބޭނުންވެ އެވެ. އަދި މާސްޓާސް ޑިގްރީ ހާސިލްކޮށްފައިވާނަމަ އަށް އަހަރުގެ މަސައްކަތުގެ ތަޖުރިބާ ހުންނަންޖެހެ އެވެ. މީގެ އިތުރުން، ކޮންމެ ފަރާތަކީ ވެސް މަދުވެގެން ދެ އަހަރު ހިންގުމުގެ ދާއިރާގައި މަސައްކަތް ކޮށްފައިވާ ފަރާތަކަށް ވާންޖެހެ އެވެ.
ޑިރެކްޓާ ޖެނެރަލްގެ މައިގަނޑު މަސްއޫލިއްޔަތުތަކުގެ ތެރޭގައި އާންމު ސިއްހަތު ރައްކާތެރިކުރުމުގެ ޕްރޮގްރާމްތައް ރާވައި، އެކަންކަމުގެ މިންގަނޑުތައް ކަނޑައެޅުން ހިމެނެ އެވެ. އަދި ބޭރު ގައުމުތަކުން ރާއްޖެއަށް ފެތުރިދާނެ ގައިންގަޔަށް އަރާ ބަލިތައް ކޮންޓްރޯލް ކުރުމާއި، ރާއްޖޭގައި އެފަދަ ބަލިތައް ފެތުރުން ހުއްޓުވުމަށް ކުރަންޖެހޭ މަސައްކަތްތައް ކުރުން ހިމެނެ އެވެ.
މީގެ އިތުރުން، އާންމު ސިއްހަތު ކުރިއެރުވުމަށްޓަކައި ބައިނަލްއަގުވާމީ ޖަމާއަތްތަކާއި އެކި ގައުމުތަކާ ގުޅިގެން އެއްބަސްވުންތައް ގާއިމުކޮށް، އެކި ޕްރޮގްރާމްތައް ހިންގުމަކީ ވެސް ޑިރެކްޓާ ޖެނެރަލްގެ ޒިންމާއެކެވެ.
