ގދ. ފިޔޯރީގައި ގާއިމުކުރުމަށް ހަމަޖެހިފައިވާ ދަޅުގައި މަސް ބަންދުކުރާ ކާރުހާނާގެ ބިން ހިއްކުމާއި ބަނދަރު ހެދުމުގެ އަމަލީ މަސައްކަތް ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުހައްމަދު ލަތީފް ރަސްމީކޮށް ފަށްޓަވައިދެއްވައިފި އެވެ.
ފިޔޯރީގައި ބޭއްވި މި ރަސްމިއްޔާތުގައި ނައިބު ރައީސްގެ އަރިހުގައި ފިޝަރީސް މިނިސްޓަރު އަހްމަދު ޝިޔާމްއާއި، ހައުސިންގް މިނިސްޓަރު ޑރ. އަބްދުﷲ މުއްތަލިބުގެ އިތުރުން ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު ބައިވެރިވެވަޑައިގެންނެވި އެވެ.
މި މަޝްރޫއުގެ ދަށުން ފިޔޯރީގައި 6.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި މަސައްކަތް ސަރުކާރުން ހަވާލުކޮށްފައިވަނީ ސޭން ޕްރައިވެޓު ލިމިޓެޑާއެވެ. ފިޝަރީސް މިނިސްޓަރީން ބުނި ގޮތުގައި، މި މަޝްރޫއުގެ ފުރަތަމަ ފިޔަވަހީގައި ހިމެނޭ ބިން ހިއްކުމާއި ބަނދަރު ތަރައްގީކުރުމުގެ މަސައްކަތް 420 ދުވަހުގެ ތެރޭގައި ނިންމާލުމަށް ވަނީ ތާވަލުކުރެވިފައެވެ.
ފިޔޯރީގައި ގާއިމުކުރާ މި ކާރުހާނާއަކީ މަސްވެރިކަމުގެ ސިނާއަތަށް އަންނާނެ ބޮޑު ބަދަލެކެވެ. އެގޮތުން މި މަޝްރޫއުގެ ދަށުން ކުރިން ގާއިމުކުރަން ނިންމާފައި އޮތް 1500 މެޓްރިކް ޓަނުގެ ކޯލްޑް ސްޓޯރޭޖްގެ ބަދަލުގައި، މިހާރު ވަނީ 3000 މެޓްރިކް ޓަނުގެ ކޯލްޑް ސްޓޯރޭޖެއް އެޅުމަށް ނިންމާފައެވެ. މީގެ އިތުރުން، ދުވާލަކު 100 ޓަނުގެ މަސް ދަޅުގައި ބަންދުކުރެވޭ ކާރުޚާނާއަކާއި، ދުވާލަކު 100 ޓަނުގެ މަސްކުނޑި އުފެއްދޭނެ ފިޝްމީލް ޕްލާންޓެއްވެސް މި މަޝްރޫއުގެ ދަށުން ތަރައްގީކުރެވޭނެއެވެ.
މި މަސައްކަތް ކުރުމަށްޓަކައި މިދިޔަ އަހަރުގެ އޭޕްރީލް މަހު ޗައިނާގެ ކުންފުންޏަކާއެކު އީޕީސީ ކޮންޓްރެކްޓެއްގައި ވަނީ ސޮއިކޮށްފައެވެ. މި މަޝްރޫއުތައް ނިމުމުން މުޅި ރާއްޖޭގައި އަހަރަކު 81 ހާސް ޓަނުގެ މަސް ދަޅުގަޔާއި ޕައުޗްގައި ބަންދުކުރެވޭނެ ކަމަށް ލަފާކުރެވެއެވެ. ފިޝަރީސް މިނިސްޓަރީން ބުނީ، މިއީ ރާއްޖޭގެ މަހުގެ އުފެއްދުންތަކުގެ ވިޔަފާރި އަމިއްލަ ފައިމައްޗަށް ތެދުވުމަށް އެޅޭ ވަރަށް މުހިންމު ފުރަތަމަ ފިޔަވަޅެއް ކަމަށެވެ.
މި މަޝްރޫއުގެ ސަބަބުން ފިޔޯރީގެ އިތުރުން މުޅި ހުވަދުއަތޮޅުގެ މަސްވެރި އާއިލާތަކަށް އުޖާލާ މުސްތަގްބަލެއް ލިބިގެންދާނެއެވެ. އަދި މިއީ ސަރަހައްދީ ތަރައްޤީއަށާއި އިގްތިސާދީ ފުދުންތެރިކަން އިތުރުކުރުމަށް މަގުފަހިވެގެންދާނެ ކަމެއް ކަމަށްވެސް އެ މިނިސްޓްރީން ފާހަގަކުރިއެވެ.
