ސަރުކާރުގެ މުހިންމު ސިނާއަތްތައް ކުރިއެރުވުމަށް ބޭނުންވާ ފަންނީ ލަފަޔާއި މަޝްވަރާ ދިނުމަށްޓަކައި އެކުލަވާލާ ތިން ކޮމިޓީއެއްގެ މެންބަރުކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.

ރައީސުލްޖުމްހޫރިއްޔާގެ އޮފީހުން އިސްނަގައިގެން އެކުލަވާލުމަށް ނިންމާފައިވާ މި ތިން ކޮމިޓީއަކީ ރާއްޖޭގެ މައިގަނޑު ދާއިރާތައް ދެމެހެއްޓެނެވި ގޮތެއްގައި ތަރައްގީކުރުމަށް މަގުފަހިކުރުމުގެ ގޮތުން އުފައްދާ ކޮމިޓީތަކެކެވެ. އެގޮތުން އެކުލަވާލުމަށް ހަމަޖެހިފައިވާ ކޮމިޓީތަކަކީ:

ޓޫރިޒަމް ސެކްޓަރ އެޑްވައިޒަރީ ކޮމިޓީ: ފަތުރުވެރިކަމުގެ ސިނާއަތް ދެމެހެއްޓެނެވި ގޮތެއްގައި ތަރައްޤީކޮށް ކުރިއެރުވުމަށް.

ކޮންސްޓްރަކްޝަން ސެކްޓަރ އެޑްވައިޒަރީ ކޮމިޓީ: އިމާރާތްކުރުމުގެ ސިނާއަތް ހަރުދަނާކޮށް ކުރިއެރުވުމަށް.

ފިޝަރީޒް ސެކްޓަރ އެޑްވައިޒަރީ ކޮމިޓީ: މަސްވެރިކަމާއި މެރިކަލްޗަރގެ ސިނާއަތް ކުރިއެރުވުމަށް.

މި ކޮމިޓީތަކުގެ މެންބަރުކަމަށް އެދި ހުށަހެޅުމުގެ ފުރުސަތު މިއަދުން ފެށިގެން 16 ފެބުރުވަރީ 2026 ވާ ހޯމަ ދުވަހުގެ މެންދުރު 12:00 ގެ ނިޔަލަށް ވަނީ ހުޅުވާލާފަ އެވެ.

ރައީސުލްޖުމްހޫރިއްޔާގެ އޮފީހުން ބުނިގޮތުގައި، މެންބަރުކަމަށް ކުރިމަތިލުމަށް އެދޭ ފޯމު އެ އޮފީހުގެ ރިސެޕްޝަނުންނާއި ވެބްސައިޓުން ލިބެން ހުންނާނެއެވެ. ފޯމު ބަލައިގަތުމަށް ހަމަޖެހިފައިވަނީ ރަސްމީ ބަންދު ދުވަސްތައް ފިޔަވައި، އެހެން ދުވަސްތަކުގެ ހެނދުނު 08:30 އިން މެންދުރު 12:00 އަށް ރައީސުލްޖުމްހޫރިއްޔާގެ އޮފީހުންނެވެ.

މި ކޮމިޓީތައް އެކުލަވާލުމުގެ މައިގަނޑު ބޭނުމަކީ ސަރުކާރުގެ ސިޔާސަތުތައް ބައްޓަންކުރުމުގައި ކަމާބެހޭ ދާއިރާތަކުގެ ފަންނީ ބޭފުޅުންގެ ލަފަޔާއި އިރުޝާދު ހޯދައި، ރާއްޖޭގެ މުހިންމު ސިނާއަތްތައް އިތުރު ހަރުފަތަކަށް ގެންދިއުންކަމަށް ރައީސުލްޖުމްހޫރިއްޔާގެ އޮފީހުން ފާހަގަކުރި އެވެ.