މެދުއިރުމަތިގައި ބޮޑު ހަނގުރާމައެއް ފެށިދާނެ ކަމުގެ ބިރު ހީވެފައި ވަނިކޮށް އީރާނާއި އެމެރިކާ އާއި ދެމެދު ސީދާ މަޝްވަރާ ކުރަން ނިންމައިފިއެވެ. މި ބައްދަލުވުމުގައި ވައިޓް ހައުސްގެ މަންދޫބު ސްޓީވް ވިޓްކޯފް ބައިވެރިވާނެ ކަމަށް އެނގިފައި ވާއިރު، ބައްދަލުވުން އޮންނާނީ ތުރްކިޔޭގެ ވެރިރަށް އަންކާރާގައެވެ.
ތުރްކިޔޭ އާއި މިޞްރާއި ޤަޠަރުން ގުޅިގެން ކުރި މަސައްކަތުން ހަމަޖެހުނު މި ބައްދަލުވުމުގެ އެޖެންޑާ އަދި ނޭނގޭ އިރު، އެމެރިކާ އިން މަސައްކަތް ކުރަނީ "ނިއުކްލިއާ ހަތިޔާރު ނެތް"ކަން ކަށަވަރުކޮށްދޭ އެއްބަސްވުމެއް ހެދުމަށެވެ.
އީރާނުން ބުނެފައި ވަނީ އެމެރިކާ އާއި އެކު މަޝްވަރާ ކުރެވިދާނެ ކަމަށާއި ނަމަވެސް އީރާނުގެ ސަލާމަތީ ކަންކަމާއި ގުޅޭ ގޮތުން ކުރާނެ މަޝްވަރާ އެއް ނޯންނާނެ ކަމަށެވެ.
މަޝްވަރާތައް ނާކާމިޔާބުވެއްޖެ ނަމަ ދެން ހަދާނެ ގޮތަކާއި މެދު މަޝްވަރާ ކުރުމަށް އިސްރާއީލުގެ އަސްކަރީ ވެރިޔާ ވަނީ ވޮޝިންޓަނަށް ގޮސްފައި ކަން ފާހަގަ ކުރެވެއެވެ.
އެމެރިކާ އިން ބުނެފައި ވަނީ އީރާނުން ގޮތްދޫނުކުރާ ނަމަ ޙަމަލާ ދޭނެ ކަމަށެވެ.
