ރަމަޟާން މަހުގެ ރޯދަ ހަދިޔާގެ ގޮތުގައި ސަރުކާރުން ގޭބިސީތަކަށް ބަހަމުންދާ މަސްދަޅު ކޭސްތަކުގެ ތެރެއިން، މިހާތަނަށް 26,000 އަށްވުރެ ގިނަ ކޭސް ދޫކޮށްފައިވާ ކަމަށް ސިޓީސް މިނިސްޓަރު އާދަމް ޝަރީފު އުމަރު ވިދާޅުވެއްޖެ އެވެ.
މިނިސްޓަރު މިކަން ހާމަކުރެއްވީ، ސަރުކާރުން ކޮންމެ ގޭބިސީއަކަށްވެސް ހަދިޔާ ކުރާ މަސްދަޅު ކޭސްތައް ބެހުމާއި ގުޅޭގޮތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ. ވަޒީރު ވިދާޅުވި ގޮތުގައި ރާއްޖޭގެ އެކި ކަންކޮޅުތަކުގައިވެސް ރޯދަ ހަދިޔާ ބެހުމުގެ މަސައްކަތް ވަރަށް ހަލުވިކަމާއެކު ކުރިއަށްދާއިރު، ރޭގެ ނިޔަލަށް މާލެއިން އެކަނިވެސް މުޅި ޖުމްލަ 26,739 މަސްދަޅު ކޭސް ވަނީ ދޫކޮށްފަ އެވެ.
ރޯދަ ހަދިޔާގެ ގޮތުގައި މަސްދަޅު ކޭސް ދޫކުރުމުގެ މަސައްކަތް ކުރިއަށް ގެންދަނީ ސިޓީސް މިނިސްޓަރީގެ ބެލުމުގެ ދަށުން، ކައުންސިލްތަކާއި، އެމްއެންޑީއެފް އާއި އެހެނިހެން އިދާރާތައް ގުޅިގެންނެވެ. މާލެ ސަރަހައްދުގައި މި މަސައްކަތް ފަށާފައިވަނީ މި މަހުގެ 24 ވަނަ ދުވަހު އެވެ.
މިނިސްޓަރު އިތުރަށް ވިދާޅުވީ، މި މަހުގެ 11 ވަނަ ދުވަހުގެ ނިޔަލަށް މާލޭގައި މިހާރު ކަނޑައެޅިފައިވާ ތަންތަނުން މަސްދަޅު ކޭސް ދޫކުރަމުން ގެންދާނެ ކަމަށެވެ. މާލެ ސަރަހައްދުގައި މަސްދަޅު ކޭސް ބެހުމުގެ މަސައްކަތް ކުރިއަށްދަނީ ކޮންމެ ރެއަކު 20:30 އިން 23:00 އަށެވެ. ކޮންމެ ކަރަންޓް މީޓަރަކަށް ކޭހެއް ދޫކުރާއިރު، ޕޯޓަލް މެދުވެރިކޮށް ކޮންމެ ރެއަކު 300 ޓޯކަން ދޫކުރުމަށް ވަނީ ހަމަޖެހިފަ އެވެ.
މިފްކޯއިން އުފައްދާފައިވާ މަސްދަޅު ކޭސްތައް އަތޮޅުތަކަށް ފޮނުވަން ފަށާފައިވަނީ މިދިޔަ މަހުގެ 27 ވަނަ ދުވަހު އެވެ. އަދި މިހާރު އުތުރުގެ ބައެއް ރަށްތަކުގައި މަސްދަޅު ކޭސް ބަހައި މުޅިން ނިންމާލާފައިވާފަ އެވެ.
ރަމަޟާން މަހު ކޮންމެ ގޭބީސީއަކަށް މަސްދަޅު ކޭހެއް ހަދިޔާ ކުރައްވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާންކުރެއްވީ، މި ސަރުކާރަށް އެއް އަހަރު ފުރުމުގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައެވެ. މިއީ ރައްޔިތުންނަށް ލުއިފަސޭހަކޮށްދިނުމުގެ ގޮތުން ސަރުކާރުން ކުރިއަށްގެންދާ މުހިންމު މަސައްކަތެކެވެ.
