ބަންގްލަދޭޝްގެ ކުރީގެ ބޮޑުވަޒީރު ބޭގަމް ހާލިދާ ޒިޔާ އަވަހާރަވުމުގެ ހިތާމައިގައި ހަނދާނީ ޖަލްސާއެއް ރާއްޖޭގައި ބާއްވައިފި އެވެ.

ބަންގްލަދޭޝްގެ ކުރީގެ ބޮޑުވަޒީރު ބޭގަމް ހާލިދާ ޒިޔާގެ ހަނދާނުގައި ބަންގްލަދޭޝް ހައިކޮމިޝަނުން ހަނދާނީ ޖަލްސާއެއް އިއްޔެ ވަނީ ބާއްވާފައި އެވެ. މި ޖަލްސާގައި މިނިސްޓަރު އޮފް ސްޓޭޓް ޑރ.މަރްޔަމް ޒުލްފާ ވަނީ ބައިވެރިވެ ވަޑައިގަންނަވާފަ އެވެ. މި ޖަލްސާ ބާއްވާފައިވަނީ ގައުމީ ޔުނިވާސިޓީގެ އޮޑިޓޯރިއަމްގައި އެވެ.

ކުރީގެ ބޮޑުވަޒީރު ބޭގަމް ހާލިދާ ޒިޔާ އަވަހާރަވީ އިއްޔެ ރާއްޖެ ގަޑިން ހެނދުނު 6:00 ހާއިރު ކަމަށް ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ބުންޏެވެ. އުމުރުފުޅުން 79 އަހަރުގައި އަވަހާރަވި ހަދީޖާ ޒިޔާއަކީ ބަންގްލަދޭޝްގެ ފުރަތަމަ އަންހެން ބޮޑުވަޒީރެވެ.

ދުނިޔޭ ގިނަ އިސްވެރިންދަނީ އެކަމަނާ އަށް ތައުޒިޔާ ކިޔަމުންނެވެ.

މީގެ އިތުރުން ރާއްޖޭގެ ހާރިޖީ ވުޒާރާއިން ވަނީ އިއްޔެ ރޭ ބޭއްވި ޖަލްސާގެ ފޮޓޮޔާއި އެކު ބަންގްލަދޭޝްގެ ހިތާމައިގައި ދިވެހި ރާއްޖެ ބައިވެރިވާ ކަމަށް އެކްށްގައި ހިއްސާ ކުރި ޕޯސްޓެއްގައި ބުނެފައި އެވެ.