ދިވެހިރާއްޖޭގެ އެކި ސަރަހައްދުތަކުގައި ބޭންކިން ހިދުމަތްތައް ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން، އަންނަ މާޗު މަހުގެ ނިޔަލަށް ބޭންކް އޮފް މޯލްޑިވްސް (ބީއެމްއެލް) ގެ އިތުރު 12 ބްރާންޗެއް ހުޅުވުމަށް ނިންމާފައިވާކަން ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
މިނިސްޓަރު މިކަން ހާމަކުރެއްވީ ދ. ކުޑަހުވަދޫގައި ބީއެމްއެލްގެ އާ ބްރާންޗެއް ހުޅުވުމަށް މިއަދު އެ ރަށުގައި ބޭއްވި ހާއްސަ ރަސްމިއްޔާތެއްގައި ވާހަކަފުޅު ދައްކަވަމުންނެވެ. ކުޑަހުވަދޫގައި މިއަދު ހުޅުވުނު ބްރާންޗަކީ ކުރިން އެ ރަށުގައި ހުރި ބްރާންޗުގެ ބަދަލުގައި، އިތުރަށް ޒަމާނީކޮށް، ކަރުދާސް ބޭނުންކުރުން މަދުކޮށް ޑިޖިޓަލް ވަސީލަތްތަކުގެ އެހީގައި އިސްލާމީ އުސޫލުތަކާ އެއްގޮތަށް ހިދުމަތް ދިނުމަށް ފަރުމާކޮށްފައިވާ ތަނެކެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ރާއްޖޭގެ ހުރިހާ ސަރަހައްދެއްގައި ބޭންކިން ހިދުމަތްތައް ފަސޭހަކަމާއެކު ލިބޭނެ މަގު ތަނަވަސްކުރުމަށް ބޭންކުން މުހިންމު މަސައްކަތްތަކެއް ކުރަމުންދާ ކަމަށެވެ. އެގޮތުން ރާއްޖޭގެ މީހުން ދިރިއުޅޭ ހުރިހާ ރަށެއްގައި މިހާރު އޭޓީއެމްގެ ހިދުމަތް ގާއިމުކޮށް ނިމިފައިވާކަން މިނިސްޓަރު ފާހަގަކުރެއްވި އެވެ.
މި އަހަރަކީ ބޭންކުގެ ހިދުމަތްތަކަށް ބޮޑު ބަދަލެއް އަންނާނެ އަހަރެއްކަން ފާހަގަކުރައްވައި މިނިސްޓަރު ވިދާޅުވީ، ރާއްޖޭގެ އެކި ސަރަހައްދުތަކުގައި 70 އަށްވުރެ ގިނަ ޑޮލަރު އޭޓީއެމް ބެހެއްޓުމަށް ނިންމާފައިވާ ކަމަށެވެ.
ބޭންކުގެ މާލީ ހާލަތާ ގުޅޭގޮތުން ވާހަކަފުޅު ދައްކަވަމުން މިނިސްޓަރު ވިދާޅުވީ، 2025 ވަނަ އަހަރުގެ ފަހު ކުއާޓަރުގައި އެކަނިވެސް ހިންގުމުގެ ފައިދާގެ ގޮތުގައި 828 މިލިއަން ރުފިޔާ ބޭންކަށް ލިބިފައިވާ ކަމަށެވެ. އަދި މުޅި އަހަރަށް ބަލާއިރު ޓެކުހަށް ކެނޑުމުގެ ކުރިން 3.2 ބިލިއަން ރުފިޔާގެ ފައިދާއެއް ލިބިފައިވާކަން ފާހަގަކުރައްވައި، މިއީ ބޭންކުގެ ހަރުދަނާ މާލީ މެނޭޖްމަންޓް ދައްކުވައިދޭ ކަމެއް ކަމަށް ވިދާޅުވި އެވެ. ސަރުކާރަކީ ބޭންކުގެ މައި ހިއްސާދާރު ކަމަށްވުމުން، މި ކާމިޔާބީގެ ފައިދާ ސީދާ ރައްޔިތުންނަށް ކުރާނެ ކަމަށްވެސް މިނިސްޓަރު ވިދާޅުވި އެވެ.
ކުޑަހުވަދޫގައި އަލަށް ހުޅުވި ބްރާންޗުގެ ސަބަބުން އެ ރަށުގެ މަސްވެރިންނަށާއި ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް ބޮޑެތި ލުއިފަސޭހަތަކެއް ލިބިގެންދާނެ އެވެ.
މިނިސްޓަރުގެ ވާހަކަފުޅުގައި ބޭންކުގެ ސީއީއޯ މުހައްމަދު ޝަރީފާއި ބޯޑު މެންބަރުންނާއި މުވައްޒަފުން ކުރައްވާ މަސައްކަތަށް ޝުކުރު އަދާކުރެއްވި އެވެ. އަދި ރައްޔިތުންނަށް ބޭނުންވާ މާލީ ހިދުމަތްތައް ފަސޭހަކަމާއެކު ފޯރުކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހާއްސަ އިސްކަމެއް ދެއްވާ ކަމެއްކަން މިނިސްޓަރު ވަނީ ފާހަގަކުރައްވާފަ އެވެ.
