ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓުގެ ފަސް ވަނަ ޓަވަރުގައި ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު 37 މީހަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފި އެވެ.
އެންޑީއެމްއޭއިން މައުލޫމާތު ދީފައިވާ ގޮތުގައި، ހިޔާގެ ފަސް ވަނަ ޓަވަރު ގައި ހިނގި މި ހާދިސާއާ ގުޅިގެން އެ ޓަވަރުގެ ހަތް އެޕާޓްމަންޓެއްގައި ދިރިއުޅޭ 37 ފަރާތަކަށް ވަނީ ވަގުތީ ބޯހިޔާވަހިކަން ހަމަޖައްސައިދީފަ އެވެ. މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވާކަމަށް އެމްއެންޑީއެފް އިން ބުންޏެވެ.
މި އަލިފާނުގެ ހާދިސާ ހިނގާފައިވަނީ ރޭގެ 7:00 ޖަހާކަށްހާއިރު އެވެ. އަލިފާން ރޯވާން މެދުވެރިވީ ވައިގޮޅިއެއްގައި ހުރި އޭސީ އައުޓްޑޯ ޔުނިޓެއްގައި ރޯވެގެންނެވެ. އެޗްޑީސީ ސެކިއުރިޓީ އަދި ސަމާލަތީ ހިދުމަތްތަކުން ވަނީ އެ ޓަވަރުގައި ދިރިއުޅޭ ފަރާތްތައް އެއްކޮށް އިވެކުއޭޓް ކޮށްފަ އެވެ. ހާދިސާގެ ރިޕޯޓު ލިބުމާއެކު އެމްއެންޑީއެފްގެ ފަޔާ އެންޑް ރެސްކިއު ސާވިސްއިން ވަނީ ވަގުތުން ހަރަކާތްތެރިވެ އަލިފާން ކޮންޓްރޯލްކޮށްފަ އެވެ.
މި ހާދިސާއަށްފަހު އިމާރާތުގެ ނަރުދަމާ ނިޒާމަށް ލިބުނު ގެއްލުންތައް ދެނެގަނެ، އެކަންކަން މަރާމާތުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިހާރު ދަނީ ކުރަމުންނެވެ. އަދި މި ހާދިސާއާ ގުޅިގެން އިތުރަށް ބަލަންޖެހޭ ކަންކަން އެޗްޑީސީއާއި އެންޑީއެމްއޭ ގުޅިގެން ދަނީ ބަލަމުންނެވެ.
