ކުރިއަށް އޮތް ދިރާސީ އަހަރަށް ދެމިގެންދާ ގޮތަށް ސްކޫލްތަކުގައި "ބިންގާ" ޕްރޮގްރާމް ފެށުމަށް ނިންމައިފި އެވެ.

އެޑިއުކޭޝަން މިނިސްޓްރީން ރާއްޖޭގެ ހުރިހާ ސްކޫލަތަކަށް ނެރުން ސާކިއުލާގައި ބުނެފައިވަނީ ކުރިއަށް އޮތް ދިރާސީ އަހަރުގައި އެ މިނިސްޓްރީން ކުރިއަށް ގެންދިއުމަށް ކަނޑައަޅާފައިވާ ޕްރޮގްރާމް "ބިންގާ"، ރާއްޖޭގެ ހުރިހާ ސްކޫލެއްގައި ވެސް ކުރިއަށް ގެންދަންވާނެ ކަމަށެވެ.

ސްކޫލުތަކުގައި "ބިންގާ" ޕްރޮގްރާމް ކުރިއަށް ގެންދިއުމަށް ހަމަޖެހިފައި ވަނީ ތީމްތަކަކަށް ބަހައިލައިގެން ތަރުތީބުވާ ގޮތެއްގެ މަތީންނެވެ. އަދި އެ ޕްރޮގްރާމް ކުރިއަށް ދާނީ މުޅި އަހަރަށް ދެމިގެންދާ ގޮތެއްގެ މަތިންނެވެ. މިނިސްޓްރީން ބުނީ މި ޕްރޮގްރާމް ކުރިއަށް ދާނީ ސްކޫލުތަކާއި ބެލެނިވެރިންނާއި މުޅި މުޖުތަމައުގެ ބައިވެރިވުމާ އެކުގައި ކަމަށެވެ.

"ބިންގާ" ޕްރޮގްރާމް ކުރިއަށް ދާނެ ގޮތަކީ:

1. ކޮންމެ މަހަކަށް ހާއްސަ ކުރެވިފައިވާ ތީމްއަކާއި އެއްގޮތަށް ހަރަކާތްތަކެއް.
2. ޕްރޮގްރާމްގެ ހުރިހާ ތީމްތައް ކަނޑައެޅުމާއި، ޕްރޮގްރާމް ހިނގުމަށް ސްކޫލުތަކަށް އެހީތެރިވުމުގެ އިތުރުން ހުރިހާ އެގުންތަކެއް ސްކޫލުތަކަށް އަންގާނީ ހިނގުމަށް ޓަކައި މިނިސްޓްރީން އެކުލަވާލަފައިވާ ކޮމިޓީން.
3. ކޮންމެ މަހަކަށް ހާއްސަ ތީމް ތައާރަފް ކުރުމަށް މިނިސްޓްރީން ޕެނަލް ޑިސްކަޝަންއެއް ނުވަތަ ތީމްއާ ގުޅޭ ބޮޑު ހަރަކާތެއް، މީޑިއާ ކެމްޕެއިނަކާއެކު މިޕްރޮގްރާމްގައި ކުރިއަށް ދާނެ.
4. މި ޕްރޮގްރާމް ހިނގުމުގައި އެންމެ އިސްދައުރެއް ސްކޫލުގެ ފަރާތުން އަދާ ކުރާނީ ސްކޫލްގެ ޕިރިންސިޕަލް ނުވަތަ ހިނގުމާ ހަވާލުވެ ހުރި އިސްފަރާތަކުން.
5. ދަރިވަރުން ކިޔަވާ އެކި މާއްދާތަކުގެ ތެރެއިން ތީމްއާ ގުޅޭ މައުލޫމާތު މި ޕްރޮގްރާމް ދެވޭނެ.
6. ސްކޫލުތަކުގެ މެނޭޖްމަންޓުން ކޮންމެ މަހެއްގެ ތީމްއާ ގުޅޭ ހަރަކާތެއް ކުރިގެންދާނެ.

ސްކޫލުތަކުން ރާވާ ހަރަކާތްތަކުގެ އިތުރުން ސްކޫލުތަކުން ކޮންމެ މަހެއްގައި ވެސް މި ޕްރޮގްރާމްގެ ދަށުން ކުރަން ޖެހޭ ކަންތައްތަކަކީ:

1. ކޮންމެ މަހަކަށް ކަނޑައަޅައިފައިވާ ތީމްއަކާ ގުޅޭ މެސެޖެއް ސްކޫލު ގޯތި ތެރޭގައި ފެންނަ ގޮތަސް ޑިސްޕުލޭ ކުރުން.
2. ކޮންމެ މަހެއްގެ ތީމް ތައާރަފް ކުރަން ހާއްސަ އެސެމްބްލީއެއް ބޭއްވުން.
3. ތީމްތަކާއި ބެހޭ ގޮތުން އެސެމްބްލީގައި ވާހަކަ ދެއްކުމުގެ ފުރުސަތު ދަރިވަރުންނަށް ދިނުން.
4. ރަށު ފެންވަރުގައި ނުވަތަ ކޮމިއުނިޓީން ބައިވެރިވާ ގޮތަށް ހަރަކާތެއް ރާވައި ހިނގުން.

މިނިސްޓްރީން ބުނެފައިވަނީ މި ޕްރޮގްރާމްގެ ފުރަތަމަ ތީމްއަކީ "ޝުކުރުވެރިވުން" ކަމަށެވެ.

މިފަދަ ޕްރޮގްރާމެއްގެ މައިގަނޑު މަގްސަދަކީ ޒިންމާދާރު، ދީނަށާއި ގައުމުދެކެ ލޯބިވާ ހަރުދަނާ އިލްމުވެރި ދަރިވަރުންތަކެއް ބިނާކުރުމެވެ. ތަރުބަވީ މި ޕްރޮގްރާމްގެ ދަށުން މި ހުރިހާ ލަނޑު ދަނޑިއެއް ހާސިލް ވާނެ ކަމަށް މިނިސްޓްރީން މައުލޫމާތު ދެ އެވެ.