މާލޭގެ ފެން ރައްކާކުރުމުގެ ގާބިލްކަން އިތުރުކުރުމަށްޓަކައި މާލޭ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ) އިން 13،000 ޓަނުގެ ދެ ފެން ތާނގީ ބެހެއްޓުމުގެ އަމަލީ މަސައްކަތް ފަށައިފި އެވެ.
އެމްޑަބްލިޔުއެސްސީން ހާމަކުރި ގޮތުގައި، މި މަސައްކަތުގެ ދަށުން މިހާރު ކުރިއަށްދަނީ ގްރައުންޑް ތައްޔާރުކުރުމާއި ފައުންޑޭޝަން އެޅުމަށް ބޭނުންވާ ޓެސްޓް ޕައިލިންގެ މަސައްކަތްތަކެވެ. މިކަމަށް ބޭނުންވާ ހުރިހާ ސާމާނެއް މިހާރު ވަނީ ސައިޓަށް ގެނެސް ތައްޔާރުކުރެވިފަ އެވެ.
މި މަޝްރޫއާ ގުޅޭގޮތުން އެމްޑަބްލިޔުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ވިދާޅުވީ، އަލަށް ބަހައްޓާ މި ދެ ތާނގީއާއެކު ޖުމްލަ 26،000 ޓަނުގެ ފެން ރައްކާކުރުމުގެ އިތުރު ގާބިލުކަން ލިބިގެންދާނެ ކަމަށެވެ. މިއީ މިހާރު މާލޭގައި ފެން ރައްކާކުރެވޭ މިންވަރާ އެއްވަރުގެ އަދަދެއްކަންވެސް އޭނާ ފާހަގަކުރެއްވި އެވެ.
ފެނުގެ ރައްކާތެރިކަން ކަށަވަރުކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، މިދިޔަ އަހަރު ހުޅުމާލޭގައި 10,000 ޓަނުގެ ފެން ރައްކާކުރެވޭ ރާއްޖޭގެ އެންމެ ބޮޑު ފެން ތާނގީ ވަނީ ގާއިމުކޮށްފައެވެ. މިއާއެކު ހުޅުމާލޭގައި ފެން ރައްކާކުރެވޭ މިންވަރު ވަނީ 22,600 ޓަނަށް އިތުރުވެފަ އެވެ. މީގެ އިތުރުން، މިދިޔަ އަހަރުގެ ޖޫން މަހުން ފެށިގެން މާލޭގައި ދުވާލެއްގެ މައްޗަށް 1,000 ޓަނުގެ ފެން އުފެއްދޭ އާ އާރުއޯ ޕްލާންޓެއްގެ ހިދުމަތްވެސް ވަނީ ދޭން ފަށާފަ އެވެ.
އެމްޑަބްލިޔުއެސްސީން އިތުރަށް ބުނީ މާލޭގައި އަލަށް ބަހައްޓާ ދެ ތާނގީގެ އިތުރުން ހުޅުމާލޭގައި ގާއިމުކުރާ 5,000 ޓަނުގެ ފެން އުފެއްދޭ ނިޒާމުގެ މަސައްކަތް ނިމި، އަންނަ މަހުގެ ތެރޭގައި ބޭނުންކުރަން ފެށޭނެ ކަމަށެވެ.
މި މަޝްރޫއުތަކަކީ ސަރުކާރުން ރައްޔިތުންނަށް މެދުކެނޑުމެއްނެތި، ދެމެހެއްޓެނިވި ގޮތެއްގައި ސާފު ބޯފެނާއި ރައްކާތެރި ނަރުދަމާގެ ހިދުމަތް ފޯރުކޮށްދިނުމަށް ކުރަމުންދާ މުހިންމު މަސައްކަތްތަކެކެވެ. މި އާރުއޯ ފެސިލިޓީތަކުގެ ސަބަބުން މާލެ ސަރަހައްދުގެ ފެނުގެ ހިދުމަތުގެ ކަށަވަރުކަން ބޮޑުތަނުން އިތުރުވެގެންދާނެ ކަމަށް އެ ކުންފުނިން ބުނެ އެވެ.
