ފިނޭންސް މިނިސްޓަރު މޫސާ ޒަމީރު، އޮމާނަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެ ގައުމުގެ ފިނޭންސް މިނިސްޓަރު ސުލްތާން ބިން ސާލިމް ބިން ސައީދު އަލް ހަބްސީއާ މިއަދު ބައްދަލުކުރައްވައި، ދެ ގައުމުގެ ދެމެދުގައި އޮތް އިގްތިސާދީ ގުޅުންތައް އިތުރަށް ފުޅާކުރުމާ ގުޅޭގޮތުން މުހިންމު މަޝްވަރާތަކެއް ބާއްވަވައިފި އެވެ.

ވެރިރަށް މަސްކަޓްގައި ބޭއްވުނު މި ރަސްމީ ބައްދަލުވުމުގައި، ދެ ގައުމުގެ ދެމެދުގައި އޮތް ޒަމާންވީ ގުޅުން ބަދަހިކޮށް، ވިޔަފާރީގެ ދާއިރާއިން އާ ފުރުސަތުތައް ހޯދުމާ ގުޅޭގޮތުން ދެ މިނިސްޓަރުން ފުޅާދާއިރާއެއްގައި މަޝްވަރާ ކުރެއްވި އެވެ. ހާއްސަކޮށް ދެ ގައުމުގެ ދެމެދުގައި ކުރެވޭ ވިޔަފާރީގެ މުއާމަލާތްތައް އިތުރުކުރެވޭނެ ގޮތްތަކާއި، އިގްތިސާދީ އެއްބާރުލުން އާ ހަރުފަތަކަށް ގެންދިއުމަށް ކުރެވިދާނެ މަސައްކަތްތަކަށް އަލިއަޅުއްވާލެއްވި އެވެ.

މި ބައްދަލުކުރެއްވުމުގައި އެންމެ ބޮޑު އިސްކަމެއް ދެއްވި އެއް ދާއިރާއަކީ ކަނޑުގެ ވަސީލަތްތަކާއި މަސްވެރިކަމުގެ ސިނާއަތެވެ. އެގޮތުން، މަސްވެރިކަމުގެ ދާއިރާގައި ހުރި ފުރުސަތުތަކުގެ ބޭނުން އެންމެ އެދެވޭ ގޮތުގައި ހިފުމަށާއި، ކަނޑުދަތުރުފަތުރުގެ ހިދުމަތްތައް ހަރުދަނާކުރުމާ ގުޅޭގޮތުން މަޝްވަރާ ކުރެއްވިއެވެ. މީގެ އިތުރުން، ވެލިއު ޗެއިން އަދި އެއާ ގުޅުންހުރި ވިޔަފާރީގެ ހަރަކާތްތަކުން ލިބެންހުރި ފުރުސަތުތަކުގެ ބޭނުން ހިފުމަކީ ދެ ގައުމުގެ އިގްތިސާދަށް ލިބޭނެ ބޮޑު ކުރިއެރުމެއްކަން ދެފަރާތުން ފާހަގަކުރެއްވި އެވެ.

މި ދަތުރުފުޅަކީ ސަރުކާރުން އިސްލާމީ ގައުމުތަކާއެކު އޮންނަ ގުޅުން ބަދަހިކޮށް، ރާއްޖޭގެ އިގްތިސާދު ސިންދަފާތުކުރުމަށް ކުރަމުންދާ މަސައްކަތްތަކުގެ ތެރެއިން ކުރިއަށްދާ މުހިންމު ދަތުރުފުޅެކެވެ. މި ބައްދަލުވުމުގައި އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވެސް ބައިވެރިވެ ވަޑައިގެންނެވި އެވެ. މި ބައްދަލުވުމުގެ ސަބަބުން އޮމާނާއި ރާއްޖެއާ ދެމެދު އޮތް މާލީ އަދި ވިޔަފާރީގެ ގުޅުންތައް އިތުރަށް ހަރުދަނާވެގެންދާނެ ކަމަށް ބެލެވެ އެވެ.