ރާއްޖޭގެ އިގްތިސާދު ކުރިއެރުވުމަށްޓަކައި ކަނޑުގެ ވަސީލަތްތައް ދިރާސާކުރުމަކީ ކޮންމެހެން މުހިންމު ކަމެއް ކަމަށް ވިދާޅުވެ، ފިޝަރީޒް މިނިސްޓަރު އަހުމަދު ޝިޔާމް، ކުރީގެ އެންވަޔަރަމަންޓް މިނިސްޓަރު އައިމިނަތު ޝައުނާގެ ފާޑުކިޔުންތަކަށް ރައްދު ދެއްވައިފި އެވެ.

ޝިޔާމް މިފަދައިން ވިދާޅުވީ، ރާއްޖޭގެ ސްޕެޝަލް އިކޮނޮމިކް ޒޯން (އެސްއީޒެޑް) އިން ތެލާއި މައުދަން ހޯދުމަށް ހުއްދަ ދިނުމަކީ މުސްތަގުބަލަށް ނުވިސްނާ ނިންމާފައިވާ ނިންމުމެއް ކަމަށާއި، އޭގެ ސަބަބުން ފަތުރުވެރިކަމާއި މަސްވެރިކަމަށް ނުރައްކާވެދާނެ ކަމަށް ޝައުނާ ވިދާޅުވުމާ ގުޅިގެންނެވެ.

ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޑރ. މުއިއްޒުގެ އަމާޒަކީ އިގްތިސާދު އެކި ދާއިރާތަކަށް ފުޅާކޮށް، ރާއްޖޭގައި ބޭރުގެ ލޮޅުންތަކުން ސަލަމާތްވެފައިވާ ވަރުގަދަ ބިންގަލެއް އެޅުން ކަމަށެވެ.

ރާއްޖެއަށް ލިބިފައިވާ ބޮޑު ކަނޑުގެ ސަރަހައްދުން މިހާތަނަށް ބޭނުން ހިފަނީ ހަމައެކަނި މަސްވެރިކަމަށްކަން ފާހަގަކުރައްވަމުން ޝިޔާމް ވިދާޅުވީ، އިތުބާރު ހުރި އިންވެސްޓަރުންނާއެކު މި ވަސީލަތްތައް ދިރާސާކުރުމަކީ ގައުމަށް ލިބޭނެ ކުރިއެރުމެއް ކަމަށެވެ. އަދި ތިމާވެށީގެ ގޮތުން ނާޒުކު ގައުމަކަށްވާތީ، ކޮންމެ މަޝްރޫއެއްވެސް ކުރިއަށްގެންދާނީ ތިމާވެށީގެ ދިރާސާތަކަށް ފަހު، ދެމެހެއްޓެނިވި އުސޫލުން ކަމުގެ ޔަގީންކަން ޝިޔާމް ދެއްވި އެވެ.

ޝިޔާމް ވިދާޅުވީ މި މަސައްކަތުގެ ސަބަބުން ރާއްޖެއަކީ 'ނޫ އިގްތިސާދުގެ' މަރުކަޒަކަށް ވެގެންދާނެ ކަމަށާއި، މެރިން ޖިއޮލޮޖީ އާއި އިންޖިނިއަރިން ފަދަ އާ ދާއިރާތަކުން ދިވެހިންނަށް ފަންނީ ވަޒީފާގެ ފުރުސަތުތައްވެސް ހުޅުވިގެންދާނެ ކަމަށެވެ.

މިނިސްޓަރު ޝިޔާމް އިތުރަށް ވިދާޅުވީ، އިގްތިސާދީ ގޮތުން އަމިއްލަ ފައިމައްޗަށް ތެދުވުމަށްޓަކައި މިހާރު އޮތް ހާލަތުން ބަދަލުވެ، އާ ފުރުސަތުތައް ހޯދުން މަޖުބޫރު ކަމަށެވެ.

ރާއްޖޭގެ އެސްއީޒެޑް ތަކުގައި ކުރެވޭނެ އިގުތިސާދީ މަސައްކަތްތަކުގެ ތެރޭގައި ތެލާއި މިނެރަލް ހޯދުމުގެ މަސައްކަތްތައް ހިމަނައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއްޔރ ވަނީ އަ ގަރާރެއް ނެރުއްވާފަ އެވެ. މީގެ ކުރިން ރައީސް ނެރުއްވި ގަރާރުގައި އެސްއީޒެޑްގައި ކުރެވޭ ހަކަތައިގެ މަސައްކަތްތަކުގެ ތެރޭގައި ހިމަނުއްވާފައި އޮތީ ހަމައެކަނި ގޭހުގެ މަސައްކަތްތަކެވެ.