ޓެކްސީ ސެންޓަރު ރަޖިސްޓަރީ ކުރަން ލުއިތަކެއް ދޭން ނިންމައި، ޓެކްސީ ގަވާއިދަށް ސަރުކާރުން އިތުރު އިސްލާހުތަކެއް މިއަދު ގެނެސްފި އެވެ.
ޓެކްސީ ގަވާއިދަށް މިފަހަރު ގެނެވުނު މައިގަނޑު އެއް ޓެކްސީ ސެންޓަރެއް ރަޖިސްޓްރީ ކުރުމަށް ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް ވަނީ މަދުކޮށްފަ އެވެ.
ޓްރާންސްޕޯޓް މިނިސްޓްރީން ބުނީ މިއީ އެއްގަމު ދަތުރުފަތުރުގެ ނިޒާމު ހަރުދަނާކޮށް ހިދުމަތް ދޭ ފަރާތްތަކަށާއި ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ގެނައި ބަދަލެއް ކަމަށެވެ. އަދި މި އިސްލާހުގެ ސަބަބުން އާ ސެންޓަރުތައް އުފެދުމަށް ހުރި ހުރަސްތައް ނެތިގޮސް، ގިނަ ބަޔަކަށް މި ދާއިރާއަށް ވަނުމުގެ ފުރުސަތު ހުޅުވިގެންދާނެ ކަމަށް ވެސް ބުންޏެވެ.
މީގެ ނަތީޖާއެއްގެ ގޮތުން މާކެޓުގައި ވާދަވެރިކަން އުފެދި، އާންމުންނަށް ލިބޭ ހިދުމަތުގެ ފެންވަރު ރަނގަޅުވާނެ ކަމަށް ބެލެވެ އެވެ.
ޓެކްސީ ގަވާއިދަށް ގެނެސްފައިވާ އިސްލާހުތަކުގެ ތެރެއިން ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓްރީވެގެން މަސައްކަތް ކުރުމުގެ ފުރުސަތުވެސް މިހާރު ވަނީ ފަހިކޮށްދީފަ އެވެ. މި ބަދަލުގެ ސަބަބުން ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިވާނެ ކަމަށާއި ހިދުމަތަށް އެންމެ ބާރުބޮޑުވާ ވަގުތުތަކުގައި ޑިމާންޑާ އެއްވަރަށް ހިދުމަތް ފޯރުކޮށްދިނުމަށް ސެންޓަރުތަކަށް އިތުރު ފަސޭހައަކަށް ވެގެންދާނެ ކަމަށް މިނިސްޓްރީން ބުންޏެވެ.
މީގެ އިތުރުން މޮބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ހިދުމަތް ދޭން ބޭނުންވާ ފަރާތްތަކުން މިނިސްޓްރީގެ ހާއްސަ ހުއްދައެއް ހޯދަންޖެހޭގޮތަށްވެސް މިހާރު ވަނީ ހަދާފަ އެވެ. މިނިސްޓްރީން ބުނީ މިއީ ދަތުރުވެރިންގެ ރައްކާތެރިކަން ކަށަވަރުކުރެވި ހިދުމަތްދޭ ފަރާތްތައް ޖަވާބުދާރީ ކުރުވުމަށް ލިބޭ ބާރެއް ކަމަށެވެ.
ހަމައެއާއެކު، ކުންފުންޏަކުން ދަތުރުފަތުރުގެ ހިދުމަތް ދޭނަމަ، އެކަމަކީ އެ ފަރާތެއްގެ މެންޑޭޓުގައި ހިމެނޭ ކަމެއްކަން ދެން ކަށަވަރުކުރަންޖެހޭނެ އެވެ. އަދި އެފަދަ ފަރާތްތަކުންވެސް ގަވާއިދާ އެއްގޮތަށް ރަޖިސްޓްރީކޮށް ހުއްދަ ހޯދުން ލާޒިމުވާނެ އެވެ.
ޓްރާންސްޕޯޓް މިނިސްޓްރީން ބުނީ މި ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ހިދުމަތްދޭ ފަރާތްތަކަށްވެސް މަންފާކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުން ކަމަށެވެ. އަދި މި ބަދަލުތަކަކީ އެއްގަމު ދަތުރުފަތުރުގެ ނިޒާމު ހަރުދަނާކޮށް، ހިދުމަތް ދޭ ފަރާތްތަކަށާއި ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ގެނެވުނު ބަދަލުތަކެއް ކަމަށްވެސް ބުންޏެވެ.
