ޓެކްސީ ސެންޓަރުތަކާއި ޑްރައިވަރުންނަށް ބޮޑެތި ލުއިތަކެއް ލިބޭގޮތަށް ޓެކްސީ ގަވާއިދަށް އިސްލާހުކޮށްފި އެވެ. މިއީ މި ގަވާއިދު އިސްލާހުކުރި ފުރަތަމަ ފަހަރެވެ.
ޓްރާންސްޕޯޓު މިނިސްޓްރީން މިއަދު ނެރުނު ބަޔާނެއްްގައި ބުނީ މި ގެނެވުނު އިސްލާހާ އެކު ދިވެހި ރާއްޖޭގައި ޓެކްސީގެ ހިދުމަތް ދިނުމުގައި ފުރިހަމަވާން ޖެހޭ ކަންކަމާއި ޓެކްސީ ހިދުމަތް ދިނުމުގެ އުސޫލުތައް އެ ގައިވައިދުގައި ބަޔާން ކޮށްފަވާނެ ކަމަށެވެ. އަދި ޓެކްސީ ހިދުމަތްދޭ ފަރާތްތަކާއި ހިދުމަތް ލިބިގަންނަ ފަރާތްތަކުގެ ހައްގުތައް ވެސް ބަޔާން ކޮށްފަވާނެ ކަމަށާއި މިއަދަށް ފަހު މިގަވައިދާށް ގެނެސްފައިވާ އިސްލާހުތަކާ އެއްގޮތަށް އަމަލުކުރަން ޖެހޭނެ ކަމަށް އެ ބަޔާނުގައި ވަނީ ބުނެފައި އެވެ.
ޓެކްސީ ގައިވަދަށް ގެނެސްފައިވާ މައިގަނޑު ބަދަލުތަކަކީ
- ޓެކްސީ ސެންޓަރެއް ރަޖިސްޓްރީ ކުރުމަށްޓަކާ ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދުކުރުން.
- ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ފުރުސަތު ދިނުން
- ދަތުރުވެރިންގެ ރައްކާތެރިކަން ކަށަވަރުކުރުމަށް މޯބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ހިދުމަތް ދޭން ބޭނުންވާ ފަރާތްތަކުން މިނިސްޓްރީގެ ހާއްސަ ހުއްދައެއް ހޯދަން ޖެހޭ ގޮތަށް އިސްލާހު ގަވައިދަށް އިސްލާހު ގެނައުން
- ކުންފުންޏަކުން ދަތުރުފަތުރުގެ ހިދުމަތް ދޭނަމަ، އެކަމަކީ އެ ފަރާތެއްގެ މެންޑޭޓުގައި ހިމެނޭ ކަމެއްކަން ކަށަވަރުކުރަންޖެހުން. އަދި އެފަދަ ފަރާތްތަކުންވެސް ގަވާއިދާ އެއްގޮތަށް ރަޖިސްޓްރީކޮށް ހުއްދަ ހޯދުން ލާޒިމްވާނެ
މިިނިސްޓްރީން ބުނީ މި ގަވައިދަށް އިސްލާހު ގެނެސްފައިވަނީ، އެއްގަމު ދަތުރުފަތުރުގެ ނިޒާމު ހަރުދަނާ ކުރުމާށާއި ހިދުމަތް ދޭ ފަރާތްތަކަށާއި ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ކަމަށެވެ.
