ހދ. ކުޅުދުއްފުށީ ރީޖަނަލް ހޮސްޕިޓަލްގައި އަލަށް ގާއިމު ކުރަން ހަމަޖެހިފައިވާ ފެސިލިޓީ އެޅުމުގެ މަސައްކަތް ކޮންޓްރެކްޓަރާ ހަވާލުކޮށް އެއްބަސްވުމުގައި މިއަދު ސޮއިކޮށްފި އެވެ.
ހެލްތު މިނިސްޓަރީން މި މަސައްކަތް ހަވާލުކުރީ އަލްޓެކް މޯލްޑިވްސް ޕްރައިވެޓް ލިމިޓެޑާ އެވެ. މި އެއްބަސްވުމުގައި ހެލްތް މިނިސްޓްރީގެ ފަރާތުން އެސޮއި ކުރެއްވީ އެ މިނިސްޓްރީގެ ސްޓޭޓް މިނިސްޓަރު ހަދީޖާ އަބްދުއްސަމަދު އަބްދުﷲ އެވެ. އަލްޓެކް މޯލްޑިވްސްގެ ފަރާތުން ސޮއިކުރީ އެކުންފުނީގެ ޖެނެރަލް މެނޭޖަރު ހުސައިން ތަސްމީން އެވެ.
އަލްޓެކް މޯލްޑިވްސް އަށް މި މަސައްކަތް ހަވާލުކޮށްފައިވަނީ 53.6 މިލިއަން ރުފިޔާ އަށެވެ. މި މަސައްކަތް ނިންމަން އެކުންފުންޏަށް ދީފައިވަނީ 435 ދުވަހުގެ މުއްދަތެކެވެ.
"ކޮންސްޓުރަކްޝަން އޮފް ޕްރައިވެޓް ރޫމް(ކޮންވާޓިބަލް ކަރަންޓީން)ފެސިލިޓީ" ގެ ނަމުން ކުޅުދުއްފުށީ ރީޖަނަލް ހޮސްޕިޓަލްގައި އަލަށް ގާއިމު ކުރަން ހަމަޖެހިފައިވާ ފެސިލިޓީގައި 14 ޕްރައިވެޓް ރޫމް ހުންނާ އެވެ. މިއީ އައިސޮލޭޝަން ފެސިލިޓީއެއް ގޮތަށް ތަރައްގީ ކުރެވޭ ތަނެއް ކަމަށް މިނިސްޓްރީން މައުލޫމާތުދެ އެވެ.
މިއީ އޭއައިބީގެ އެހީގައި އިމާރާތްކުރާ ފެސިލިޓީއެކެވެ. މިނިސްޓްރީން ބުނީ މި ފެސިލިޓީ އަކީ އޭއައިބީން ރާއްޖޭގައި ކުރިޔަށްގެންދާ ފުރަތަމަ ސްޓޭންޑް އެލޯން ޕްރޮޖެކްޓް ކަމަށެވެ.
ހެލްތު މިނިސްޓްރީއިން އިތުރަށް ބުނިގޮތުގައި މިފެސިލިޓީގައި އެޅޭ 14 ކޮޓަރި ހުންނާނީ ބަލިމިހާގެ އިތުރުން އެހީތެރިއާ އެކު ހުރެވޭ ގޮތަށެވެ. އަދި ކޮންމެ ކޮޓަރިއެއްގައި ފާހަނާ ހުންނާނެ އެވެ.
ހެލްތު މިނިސްޓްރީއިން ބުނީ މި ފެސިލިޓީގެ ސަބަބުން ކުޅުދުއްފުށި ރީޖަންގައި ދިރިއުޅޭ ރައްޔިތުންގެ އިތުރުން ރާއްޖޭގެ އެހެން ސަރަހައްދުތަކުން ބޭސްފަރުވާ ކުރުމަށް ކުޅުދުއްފުށްޓަށް ދާ ރައްޔިތުންނަށް ވަރަށް ބޮޑު ލުޔެއް ލިބޭނެ ކަމަށެވެ. އަދި ކޮވިޑް-19 ފަދަ ފަސޭހައިން ގައިން ގަޔަށް އަރާ ބަލިތަކުގެ ހާލަތްތަކުގައި، ވަކިން ބަލިމީހާ އައިސޮލޭޓް ކުރެވޭނެ ގޮތް ވެސް އެ ފެސިލިޓީއާ އެކު ހޮސްޕިޓަލްގައި ފަހިވެގެން ދާނެ ކަމަށް ބުންޏެވެ.
