ދިވެހިރާއްޖެއާއި އިންޑިއާއާ ދެ ގައުމުގެ ރައްޔިތުންގެ މަންފާއަށްޓަކައި ކުރާ މަސައްކަތްތައް ކުރިއަށްގެންދާނެ ކަމަށް އިންޑިއާގެ ބޮޑު ވަޒީރު ނަރެންދުރަ މޯދީ ވިދާޅުވެއްޖެ އެވެ.
މޯދީ މި މޭރުމުން ވިދާޅުވީ، ދިވެހި ބަހުން ލިޔުއްވައި އެކްސްގައި ހިއްސާކުރެއްވި ޕޯސްޓެއްގަ އެވެ. މޯދީ ވިދާޅުވީ، އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަރިސްކުރެއްވި ހޫނު ތަހުނިޔާއާއި ހެޔޮ އެދުންތައް އިހްތިރާމާއިއެކު ބަލައިގަންނަ ކަމަށެވެ.
މޯދީ ވިދާޅުވީ، ދެ ގައުމުގެ ރައްޔިތުންގެ މަންފާއަށްޓަކައި އެކުގައި ކުރާ މަސައްކަތްތައް ކުރިއަށްގެންދާނެ ކަމަށާއި، ދިވެހި ރައްޔިތުންނަށް އުފާވެރި އަދި ފާގަތި ދުވަސްތަކަކަށް އެދިވަޑައިގަންނަވާ ކަމަށެވެ.
އިންޑިއާގެ ޖުމްހޫރީ ދުވަހާއި ގުޅިގެން ރައީސް ޑރ. މުއިއްޒު އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، ރާއްޖެއިން ބޭނުންވަނީ އިންޑިއާއާއެކު ބާއްވާފައިވާ ގުޅުން އިތުރަށް ވަރުގަދަކޮށް، ދެ ގައުމަށް ވެސް ފައިދާވާނެ ގޮތަކަށް ކަންކަން ކުރިއަށްގެންދިއުމަށް ކަމަށެވެ. ރައީސް ވަނީ އިންޑިއާގެ ރައީސް ޝްރީ ޑްރައުޕަދީ މުރްމު އަށާއި، ބޮޑުވަޒީރު ނަރެންދުރަ މޯދީގެ އިތުރުން، އިންޑިއާގެ އެންމެހައި ރައްޔިތުންނަށް ތަހުނިޔާއާއި ހެޔޮއެދުންތައް ފޮނުއްވައިފަ އެވެ.
ރައީސްގެ މެސެޖުގައި، ދިވެހިރާއްޖެއާއި އިންޑިއާއާ ދެމެދު އޮތް ޒަމާންވީ ގާތް ރަހުމަތްތެރި ގުޅުމުގެ މައްޗަށް އަލިއަޅުއްވާލެއްވި އެވެ. އެގޮތުން ދެ ގައުމުގެ ދެމެދުގައި އޮތް އެއް ގައުމުން އަނެއް ގައުމަށް ކުރާ އިހްތިރާމާއި، ބަދަހި ރަހުމަތްތެރިކަމުގެ ގުޅުން އެމަނިކުފާނު ފާހަގަކުރެއްވި އެވެ.
ރައީސް ވިދާޅުވީ، އިންޑިއާގެ ޖުމްހޫރީ ދުވަހަކީ މިނިވަންކަމާއި ޑިމޮކްރަސީއާއި ހިންގުން ހަރުދަނާކުރުމަށް އެ ގައުމުގެ ރައްޔިތުން ދޭ އަހައްމިއްޔަތުކަން ރަމްޒުކޮށްދޭ ދުވަހެއް ކަމަށެވެ. އަދި ރާއްޖެއިން އަބަދުވެސް ބޭނުންވަނީ ދެ ގައުމުގެ ގުޅުން އިތުރަށް ހަރުދަނާކޮށް، ދެ ގައުމު ގުޅިގެން ދެ ފަރާތަށްވެސް ލާބަޔާއި ފައިދާ ލިބޭނެ ގޮތްތަކަށް މަސައްކަތް ކުރުމަށް ކަމަށްވެސް ރައީސް ވިދާޅުވި އެވެ.
އިންޑިއާގެ ޖުމްހޫރީ ދުވަސް ފާހަގަކުރަނީ އެ ގައުމުގެ ގާނޫނުއަސާސީ އެކުލަވާލައި، އަމަލުކުރަން ފެށި ދުވަހާ ގުޅުވައިގެންނެވެ. އެއީ 1950 ވަނަ އަހަރުގެ ޖެނުއަރީ މަހުގެ 26 ވަނަ ދުވަހެވެ. މީގެ އިތުރުން، މި ދުވަހަކީ އިންޑިއާގެ ފުރަތަމަ ރައީސް ޑޮކްޓަރ ރަޖެންދްރާ ޕްރަސާދް، ރައީސްކަމުގެ ހުވާކުރެއްވި ތާރީހީ ދުވަސް ވެސް މެއެވެ.
